لە ماوەی ڕۆژانی ڕابردوودا، کاک ئیبراھیم ھوشمەند، ئەندامی حیزبی دێموکراتی کوردستانی ئێران، بەھۆی نەخۆشی لە ئەیالەتی پۆرتلەندی ئەمریکا کۆچی دوایی کرد.
کاک ئیبراھیم خەڵکی ئاوایی دەرەتفێ سەر بە شاری مەریوان بوو و لە بنەماڵەیەکی نیشتمانپەروەر لەدایک بوو.
ساڵی ١٣٧١ی هەتاوی پێوەندیی بە ڕیزەکانی تەشکیلاتی نهێنیی حیزبی دێموکراتی کوردستانی ئێرانەوە دەگرێت و کاتێک ڕێژیم لێی مەشکووک دەێت، دەیگرن و بۆ ماوەی ساڵێک زیندانی دەکرێت.
دوای ئازادبوونی چیتر ناتوانێت لە نێوخۆ بمێنێتەوە، بۆیە خۆی دەگەیەنێتە ڕیزەکانی ھێزی پێشمەرگەی کوردستان و بەشداری خەباتی ئاشکرا دەبێت.
دوای سێ ساڵ، کاک ئیبراهیم ڕێگای ھەندەران دەگرێتەبەر و لە ئەمریکا دەگیرسێتەوە. لەوێش وەکوو ئەندامێکی دڵسۆز و چالاک لە خزمەت حیزبدا بوو.
حیزبی دێموکراتی کوردستانی ئێران بەبۆنەی کۆچی دوایی کاک ئیبراهیم، سەرەخۆشی لە بنەماڵە و کەسوکار و هاوسەنگەرانی ناوبراو دەکات و خۆی بە هاوخەمیان دەزانێت.
