لە درێژەی دەسبەسەرکردنی منداڵان لە پیرانشاردا، سێ منداڵی دیکە لەلایەن هێزە ئەمنییەتییەکانی ڕێژیمەوە لەم شارە دەسبەسەر کران.
بەپێی ڕاپۆرتی کوردپا، ڕۆژی دووشەممە، ٢٩ی خەزەڵوەر، کۆمار نەبی، تەمەن ١٦ ساڵ و کوڕێ شێرکۆ، خەڵکی پیرانشار، لەلایەن هێزە ئەمنییەتییەکانی ڕێژیمەوە دەسبەسەر کرا و بۆ شوێنێکی نادیار ڕڕاگوێزرا.
هەر لەم پێوەندییەدا، شەوی دووشەممە، دوو منداڵی دیکە بە ناوەکانی پێشەوا نەبی، تەمەن ١٦ ساڵ و کارزان نەبی، تەمەن ١٥ ساڵ و خەڵکی پیرانشار، لەلایەن هێزە سەرکوتکەرەکانی ڕێژیمەوە دەسبەسەر کران.
بەپێی ڕاپۆرتی کوردپا، ئەم سێ منداڵە بە بێ بەڵگەی یاسایی، لەلایەن هێزە ئەمنییەتییەکانەوە دەسبەسەر کراون.
تاکوو ئێستا سەبارەت بە هۆکار ی دەسبەسەرکران و تۆمەتە وەپاڵدراوەکان دژی ئەم سێ منداڵە، زانیارییەک لەبەر دەستدا نییە.
هەر لەم پێوەندییەدا، ڕۆژی یەکشەممە، ٢٨ی خەزەڵوەریش دوو منداڵی دیکە بە ناوەکانی هێدی یووسفی ئەقدەم ، تەمەن ١٦ ساڵ و فەرزین نەبی، تەمەن ١٤ ساڵ، هەر دوو خەڵکی پیرانشار، لەلایەن هیزە ئەمنییەتییەکانی ڕێژیمەوە دەسبەسەر کران.
