ڕۆژی چوارشەممە، ٨ی سەرماوەز (٢٩ی نۆڤامبری ٢٠٢٣)، محەممەد فەقێ‌عەلی بەرپرسی پەیوەندییە نێونەتەوەییەکانی حیزبی دێموکرات لە وڵاتی ئوتریش، سەردانی لێژنەی بەشی پەیوەندییە نێونەتەوەییەکانی پارلمانتارانی حیزبی سۆسیال دیمۆکراتی ئوتریشی کرد و لەلایەن دوکتۆر هاراڵ ترۆخ، یەکێک لە بەرپرسانی ئەو لیژنەیەوە پێشوازیی لێ کرا.
محەممەد فەقێ‌عەلی لەم دیدارەدا، باسی لە کوردستان و کورد و هەروەها خەباتی ئەم نەتەوەیە کرد.
دواتر پەرژایە سەر ئەم خاڵانەی خوارەوە:
ـ فرەنەتەوەبوونی ئێران و گرینگیدانی وڵاتانی ئورووپایی و جیهان بە فرەنەتەوە و فرە کولتووربوونی ئێران
ـ تێرۆر و ڕەشەکوژییەکانی ڕێژیم و هەروەها هەناردەکردنی تێرۆریسم بۆ دەرەوەی ئێران لەلایەن ڕێژیمەوە
ـ هێرشەکانی ڕێژیم بۆ سەر بنکە و بارەگای لایەنە سیاسییەکان لە باشووری کوردستان
ـ هێرشی تێرۆریستی بۆ سەر پارێزەر سۆهراب ڕەحمەتی
ـ گرینگینەدانی ڕێژیمی ئێران بە یاساوڕێسا ێونەتەوەییەکان
ـ هەڵوێستگرتنی جیددیی وڵاتانی ئورووپایی و بەتایبەتی ئوتریش بۆ ئەوەی کە سپای پاسداران وەک ڕێکخراوێکی نیزامیی ترۆریستی بناسێندرێت و بخرێتە لیستی تێرۆرەوە
لە درێژەدا دوکتۆر ترۆخ، وێڕای سوپاس لەم سەردانە، پشتیوانیی خۆی بۆ دۆزی ڕەوای گەلی کورد دەربڕی و وتی، ئێمە وەک سوسیال دێموکراتەکانی وڵاتی ئوتریش پێمانوایە کە نەتەوەی کورد لە هەر چوار پارچەی کوردستان مافی بێ ئەملاوئەولای خۆیەتی کە مافی چارەی خۆنوسینی پارێزراو بێت و وەک نەتەوەیەکی ئازاد و سەربەست لەپاڵ نەتەوەکانی دیکەی ئەم وڵاتانەدا بە سەربەستی بژی، ئێمە بە کردەوە هەوڵی بۆ دەدەین و لە سەردان و چاوپێکەوتنەکانمان لەگەڵ نوێنەرایەتی یئەو وڵاتانەدا بە ئاشکرا باسی دەکەین.
لە کۆتاییدا باس لە چڕترکردنەوەی پێوەندییەکانی دوو لایەن سەبارەت بە پرسەکانی ئێران وکوردستان کرایەوە.
