هێزە ئەمنییەکانی ڕێژیم بە هێرشکردنە سەر دوو خوێندنگەی ئایینی لە زاهیدان، لانیکەم ٢٥٣ خوێندکاری بەلووچیان بە لێدان و توندوتیژی دەسبەسەر کرد.
بەپێی ڕاپۆڕتی "حاڵ‌وەش" سەرلەبەیانیی ڕۆژی دووشەممە، ٢٠ی سەرماوەز هێزە ئەمنییەکانی ڕێژیم هێرشیان کردووەتە سەر دوو خوێندنگەی "مەولەوی عەبدولعەزیز" و "ئەبووزەر غەفاری" لە زاهیدان.
هێزە ئەمنی و سەرکوتکەرەکانی ڕێژیم بە جێگیرکردنی ١٣ ئوتووبووس لەو شوێنەدا، سەرەتا خوێندنگەکانیان گەمارۆ داون و دواتر هێرشیان کردووەتە سەر خوێندکاران و بە توندوتیژی و سوکایەتیپێکردنەوە هەوڵی دەسبەسەرکردنی ئەو خوێندکارانەیان داوە کە ناسنامەیان پێ نەبووە.
کۆمەڵگەی مامۆستایانی "دارولعلووم"ی زاهیدان بە دەرکردنی بەیاننامەیەک ئەم کردەوەیەی ڕێژیمی بە بێڕیزی و دژی یەکگرتوویی ناو برد و خوازیاری هەوڵی بەپەلە بۆ پێشگرتن لە توندوتیژی و ئاڵۆزی لە بەلووچستان بوو.
هەر لەم پێوەندییەدا، کاناڵە هەواڵدەرییەکانی سەر بە سپای تێرۆریستیی پاسداران خوێندکارانی دەسبەسەرکراویان وەکوو تێرۆریست لە قەڵەم دا و ڕایانگەیاند کە ئەو کەسانە لە کاتی ڕێکخستنی کردەوەی تێرۆریستیدا دەسبەسەر کراون.
مەولەوی عەبدوڵغەفار نەقشبەندی لە کاردانەوە بە بێڕێزی بە خوێندنگەی پەیڕەوانی مەزهەبی سوننە لەلایەن ڕێژیمەوە ڕایگەیاند: "ئەمڕۆ هێزە ئەمنییەکانی ڕێژیم بە بێ بەڵگەی یاسایی هێرشیان کردە سەر دوو خوێندنگەی ئایینی و خوێندکارێکی زۆریان دەسبەسەر کردووە، ئەگەر زانایانی بەناوبانگ و سەرۆکان و دەسەڵاتدارانی بەلووچ ئەم بێدەنگییە نەشکێنن و نەیەنە مەیدان، دەبێ چاوەڕێی ئەم هەوسارپچڕاوییە لەنێو ماڵەکانی خۆیاندا بن."
لە ماوەی یەکساڵی ڕابردوو و پاش کوشتاری هەینیی خوێناویی زاهیدان، گوشار، هەڕەشە و دەسبەسەرکرانی هاووڵاتییان و زانایانی ئایینیی سوننە و هەروەها وەپاڵدانی تۆمەتی ناڕەوا دژی ئەم کەسانە زیادی کردووە.
