ئیسرائیل مووشەکباران و بوردومانەکانی بۆ سەر غەززە چڕتر کردەوە و لە ئاکامدا ٢٤ کەسی دیکە کوژران.
ڕۆژی پێنجشەممە ٢٣ سەرماوەز، سەرەڕای چڕبوونەوەی داواکارییە نێودەوڵەتییەکان بۆ کەمکردنەوەی کوژرانی خەڵکی سێڤیل و گرینگیدان بە کارەساتی مرۆیی لە ناوچەکەدا، ئیسرائیل درێژەی بە هێرشەکانی خۆی لە غەززە دا.
بە پێی ڕاپۆرتی ''ڕویترز''، لە هێرشێکی ئیسرائیل بۆ سەر دوو ماڵ لە ناوەندی شاری ڕەفەح ، ٢٤ کەس کوژراون.
گرژییەکانی نێوان حەماس و ئیسرائیل لە ١٥ی ڕەزبەردا دەستی پێکرد کە تا ئێستاش دریژەی هەیە و بە هەزاران کەس بوونەتە قوربانی.
لە هێرشەکەی ڕۆژی ١٥ی ڕەزبەری حەماس و جیهادی ئیسلامی بۆ سەر باشووری ئیسرائیل، لانیکەم ١٢٠٠ کەس کوژران کە زیاترینیان کەسانی سێڤیل بوون و لانیکەم ٢٤٠ منداڵ، ژن و کەسی بەساڵاچوو بەدیل گیران.
ئەمریکا، بریتانیا، یەکیەتیی ئورووپا، ژاپۆن، ئوسترالیا و چەندین وڵاتی دیکە، گرووپەکانی حەماس و جیهادی ئیسلامییان خستووەتە لیستی ڕێکخراوە تێڕۆریستییەکانی جیهانەوە.
