ڕۆژی یەکشەممە، ٢٦ی سەرماوەز(٧ی دێسامبری ٢٠٢٣)، لەلایەن فێدراسیۆنی کۆمەڵە کوردییەکان لە وڵاتی دانمارک لە شاری (Albertslund ) نزیک لە کۆپێنھاگ پێتەختی ئەم وڵاتە، ڕۆژی ئاڵای کوردستان بەرز ڕاگیرا.
هەیئەتێکی کۆمیتەی حیزبی دێموکڕاتی کوردستانی ئێران لە دانمارک، پێکهاتوو لە ئەحمەد ڕەحمانی، کەژوان یووسفی، ڕەحیم خالید نژاد و دیار مەولایی لەسەر بانگهێشتی فێدراسیۆن بەشداری ئەم ڕێوڕەسمە بوون و لەلایەن فێدراسیۆنی کۆمەڵە کوردییەکانەوە لە وڵاتی دانمارک، بە گەرمی پێشوازییان لێ کرا.
ڕێوڕەسمەکە بە خوێندنی سروودی ئەی ڕەقیب لەلایەن کۆمەڵێک لە منداڵانەوە دەستی پێ کرد کە هەرکامەیان مۆمێک و ئاڵایەکی کوردستانی بەدەستەوە گرتبوو.
لەلایەن عەدنان ئاغاجان، بەرپرسی فێدراسیۆنی کۆمەڵە کوردییەکان لە وڵاتی دانمارکەوە چەند ساتێک بێدەنگی بۆ ڕێزگرتن لە گیانی پاکی شەھیدانی کورد و کوردستان ڕاگەیەندرا.
چەندین لایەن و ھێزی سیاسیی کوردستانی لەم ڕێوڕەسمەدا بەشداربوون.
