لە درێژەی مەحکوومکردنی دەرکردنی سزای لەسێدارەدان بۆ ژمارەیەک لە بەندکراوانی سیاسی لە ئێران، ١٨ ڕێکخراوی مافی مرۆڤ لە بەیاننامەیەکدا سەبارەت بە لەسێدارەدانی نزیک بە چوار بەندکراوی سیاسیی کورد هۆشدارییان دا و داوایان لە کۆمەڵگەی نێودەوڵەتی کرد ڕێوشوێنی خێرا بۆ ڕێگریکردن لە لەسێدارەدانەکان بگرنەبەر.
دەزگای بەناو دادوەریی کۆماری ئیسلامیی ئێران سزای لەسێدارەدانی بۆ مۆحسن مەزڵووم، پژمان فاتحی، وەفا ئازەربار و هەژیر فەرامەرزی دەر کردووە.
ئەم ١٨ ڕێکخراوە لە درێژەی بەیاننامەکەیاندا، دانیشتنەکانی دادگاییکردنی ئەم چوار بەندکراوە سیاسییە کوردەیان لە دادگای ئینقلابی کۆماری ئیسلامی بە پێشێلکردنی توندی بنەماکانی دادگاییکردنی دادپەروەرانە و ڕەوتی دادوەری بەپێی پێوەرە نێودەوڵەتییەکان زانیوە.
ئەم ١٨ ڕێکخراوە هۆشداریشیان داوە کە بەهۆی پەسەندکردنی بەپەلەی سزای لەسێدارەدان بۆ ئەو چوار کەسە لە میانەی هەڵمەتی ڕێژیم بۆ سەرکوتکردنی ئۆپۆزسیۆن و ترساندنی کۆمەڵگەی ئێران بە زیادکردنی ژمارەی ئێعدامەکان، مەترسیی جێبەجێکردنی دەستبەجێی حوکمی لەسێدارەدان، هەڕشە لە گیانیان دەکات.
ئەو ١٨ ڕێکخراوە ئاماژەیان بەوە کردووە کە زۆر کەسی دیکە مەترسیی لەسێدارەدانیان لەسەرە و ئێران لە بواری لەسێدارەدانی هاووڵاتییان پلەیەکی بەرزی لە جیهاندا تۆمار کردووە.
ئەو ١٨ ڕێکخراوە نووسیویانە: بەکارهێنانی بەربڵاو و نایاسایی ڕێژیمی ئێران لە سزای لەسێدارەدان، سەرەڕای داواکارییە بەردەوامەکانی کارناسانی مافی مرۆڤی ڕێکخراوی نەتەوە یەکگرتووەکان و ڕێکخراوە مەدەنییەکان، نیشان دەدات کە کۆماری ئیسلامیی ئێران بە بێ وەستان درێژە بە جێبەجێکردنی سزای لەسێدارەدان دەدات. مەگەر ئەوەیکە ڕێکخراوی نەتەوە یەکگرتووەکان و کۆمەڵگەی نێودەوڵەتی، بە جۆرێک تێچووی سیاسیی ئەم کارە بۆ کۆماری ئیسلامی زیاد بکەن.
