ڕەوتی کوژران و برینداربوونی کۆڵبەران لە سنوورەکانی کوردستان، ڕووی لە زیادبوونەوە و هێزە چەکدارەکانی ڕێژیم بە بێ ئاگادارکردنەوەی پێشوو و هۆشداریدان بە کۆڵبەران، تەقەیان لێ دەکەن.
ئاژانسی هەواڵدەریی کوردپا، بە بڵاوکردنەوەی ئامارێک باسی لە ڕێژەی کوژران و برینداربوونی کۆڵبەران لە ساڵی ٢٠٢٣، لە سنوورەکانی کوردستاندا کردووە.
بەپێی ئەم ئامارە، بەگشتی ٣٤١ کۆڵبەر لەلایەن هێزە چەکدارەکانی ڕێژیمەوە کوژراون و بریندار کراون کە ٢٢ کەسیان تەمەنیان کەمتر لە ١٨ ساڵ بووە.
کوردپا بە جیاکردنەوەی ئامارەکە، ڕایگەیاندووە کە لەو ٣٤١ کەسە، ٣٢ کەسیان بە تەقەی هێزە چەکدارەکان کوژراون و ٣٠٧ کەسیشیان بریندار کراون و دوو کەسیشیان بێسەروشوێنن.
بەپێی شیکارییە ئامارییەکان، ٨٧ لەسەدی ئەم کۆڵبەرانە، کەوتوونەتە بەر تەقەی ڕاستەوخۆی هێزە چەکدارەکانی کۆماری ئیسلامییەوە و کوژراون و بریندار کراون، ٤ لەسەدیشیان لە ئاکامی لێدان و توندوتیژیی هێزە نیزامییەکاندا بریندار کراون.
کوژران وبرینداربوونی ٣.٥ لەسەدیان بە هۆی بەربوونەوە لە بەرزایی و ١.٥ لەسەدیشیان بە هۆی تەقینەوەی مین بووە.
باقی حاڵەتەکانی سەرمابردوویی، ڕاوەستانی دڵ، بەربوونەوە لە بەرزایی و بێسەروشوێنبوون، هەر کامەیان ڕێژەیەکی کەمتر لە یەک لەسەدی ئەم ئامارە پێک دێنن.
ئامارەکەە نیشانی دەدات کە ٢٩٧ کەس لەم کۆڵبەرانە بە تەقەی راستەوخۆی هێزە چەکدارەکانی ڕێژیم کوژراون و بریندار کراون.
ئەم ئامارە باس لەوە دەکات کە ٤٩ لەسەدی کۆڵبەران لە سنوورەکانی بانە، و ٣٢ لەسەدیان لە سنووری نەوسوود، بوونەتە قوربانی.
قەیرانی ئابووری، هەڵاوسان و کەمبوونەوەی توانایی خەڵک بۆ دابینکردنی بژێوی ژیان، لە هۆکارە سەرەکییەکانی بەرزبوونەوەی ڕێژەی کۆڵبەری لە کوردستانە.
