ڕۆژی شەممە، ٣٠ی بەفرانبار، خۆپیشاندانێک لە شاری ڤەنکۆڤێر بۆ مەحکوومکردنی سزای لەسێدارەدان لە ئێران بەڕێوە چوو.
کۆمیتەی حیزبی دێموکراتی کوردستانی ئێران لە ڕۆژاوای کانادا، و ژمارەیەکی بەرچاو لە ئەندامانی حیزب، لەگەڵ ئێرانییانی دانیشتووی ئەم شارە بەشدارییان لەم خۆپیشاندانەدا کرد.
بەشداربووان بە مەبەستی مەحکوومکردنی ڕێژیمی ئیسلامیی ئێران و هەروەها مەحکوومکردنی سزای لەسێدارەدرانی داسەپاو بەسەر چەندین بەندكراو و بەتایبەت بەندکراوانی سیاسی كورد گرد ببوونەوە.
بەشداربووانی ئەم خۆپیشاندانە دژی ڕێژیمی تێروریستیی كۆماری ئیسلامیی ئێران بەتایبەتی حوکمی نامرۆڤانەی لەسێدارەدان دروشمیان دا و بە هەڵگرتنی وێنەی ئەو كەسانە كە لە ئێران حوکمی سێدارەیان بەسەردا سەپێنراوە داوایان لە حكوومەتی كانادا و ڕێكخراوە نێۆدەوڵەتییەكان کرد كە لەمەڕ ئەو ڕەشەکوژییەی ڕێژیم بێدەنگ نەبن و بە هەر شێوەیەک دەبێ پێشی ئەم جنایەتانەی ڕێژێمی ئێران بگرن و ئەو ڕێژیمە شەرمەزار بكەن.
خۆپیشاندەران سەرنجی خەڵكی سەر شەقامەکانی ڤەنکۆڤێریان بۆ لای خۆیان ڕاكێشا و بەشێک لە خەڵکەکە بەشدارییان لە خۆپیشاندانەکەدا کرد و بە دووپاتکردنەوەی دروشمەکان و بە گرتنی وێنە و ڤیدیۆ، پشتیوانیی خۆیان لە خۆپیشاندەران نیشان دا.
