ڕۆژی شەممە، ٣٠ی بەفرانبار، بە مەبەستی مەحکوومکردنی هێرشی دڕندانەی کۆماری ئیسلامی بۆ سەر شاری هەولێر و کردنە ئامانجی چەند ناوچەیەکی سڤیل نشینی ئەم شارە بە مووشەک کە کوژران و برینداربوونی چەند کەسی بەدواوە بوو، خۆپیشاندانێک بەڕێوە چوو.
ئەم خۆپیشاندانە لەلایەن کۆنفدراسیۆنی ڕەوەندی کوردی و بە پشتیوانیی هێز و لایەنە سیاسییەکانی کوردستان لە وڵاتی ئوتریش و لە نزیک باڵوێزخانەی کۆماری ئیسلامی لە شاری ڤییەن پێک هات.
پەیامی ڕەوەندی کوردی بە زمانەکانی ئینگلیزی و ئاڵمانی و کوردی و بە زاراوەی کرمانجی خوێندرایەوە.
کۆمیتەی حیزبی دێموکراتی کوردستانی ئێران بەشدارییەکی چالاکانەی لەم خۆپیشاندانە بوو.
پەیامی حیزب و لایەنە سیاسییەکانی کوردستانیش لەلایەن محەممەد فەقێ‌عەلی بەرپرسی بەشی پەیوەندییەکانی کۆمیتەی حیزبی دێموکراتەوە خوێندرایەوە.
