لە ڕێوڕەسمێکدا لە وڵاتی فەرانسە پەردە لەسەر کتێبی "کوردستانی مەحاڵ، لە خەونی تەواو نەکراوەوە هەتا تێرۆرکردنی سەرکردەی کورد قاسملوو" لە نووسینی کارۆل پرەنهیوبەر، خانمە نووسەری ڤێنێزوێلایی و دۆستی لەمێژینەی شەهید دوکتور قاسملوو و حیزبی دێموکرات لادرا.
دوانیوەڕۆی ڕۆژی شەممە ١ی بانەمەڕی ١٤٠٣ی هەتاوی، بە ئامادەبوونی بەشێکی بەرچاو لە کەسایەتییە فەرانسەوییەکان و کوردستانییەکانی دانیشتووی پاریس، پەردە لەسەر کتێبی"کوردستانی مەحاڵ، لە خەونی تەواونەکراوەوە هەتا تێرۆرکردنی سەرکردەی کورد قاسملوو" لادرا.
ئەم کتێبە لە سەرەتادا بە زمانی ئینگلیزی نووسراوە و دواتر لەلایەن جۆزێفا بێرتۆلینۆ وەرگێردراوەتە سەر زمانی فەرانسەوی و چاپ و بڵاو کراوەتەوە.
سەرەتای کۆڕەکە دوکتور کەنداڵ نەزان بەرپرسی ئەنستیۆتی کوردی پاریس خانمی نووسەر کارۆل پرەنهیوبەری بە ئامادەبووان ناساند و دواتریش خانمی نووسەر باسێکی لەسەر کتێبە نوێیەکەی کرد کە کتێبەکە لەسەر چۆنییەتیی تێرۆرکرانی دوکتور قاسملوو و بەدواداچوونێکە بۆ دۆسییەی تێرۆری ئەو ڕێبەرە شەهیدە نووسراوە.
جێی ئاماژەیە هەیئەتێکی حیزبی دێموکراتیش بە سەرپەرستی کاک حەسەن شەرەفی ئەندامی ناوەندی بەڕێوەبەریی حیزب و چەندین ئەندامی حیزبی دێموکرات لە وڵاتی فەرانسە لە کۆڕەکەدا بەشدار بوون.
شایانی باسە کە کۆڕەکە لەلایەن ئەنستیۆتی کوردی پاریس ڕێک خرابوو و کۆتایی کۆڕەکە بە پرسیارکردن لە نووسەری کتێبەکە و وڵامدانەوەی لەلایەن ناوبراوەوە کۆتایی پێهات.
