جەعفەر (دارا) ئەمینی زیندانی سیاسیی پێشوو و چالاکی مەدەنیی خەڵکی بۆکان، ڕۆژی شەممە ٢٦ی جۆزەردان لەلایەن هێزەکانی ڕێژیمەوە لە ماڵەکەی خۆی لەو شارەدا دەسبەسەر کرا و بۆ شوێنێکی نادیار ڕاگوێزرا.
بەرەبەیانیی ڕۆژی شەممە ٢٦ی جۆزەردان هێزەکانی ڕێژیم هەڵیانکوتاوەتە سەر ماڵی ئەم چالاکە مەدەنییە و بەبێ بەڵگەی یاسایی ئەو هاووڵاتییە کوردەیان دەسبەسەر کردووە.
سەرەڕای بەدواداچوون و سەردانکردنی بنەماڵەکەی ناوبراو بۆ دامودەزگا ئەمنییەکان و دادگای بۆکان و ناوەندەکانی ڕێژیم تا ئێستا هیچ زانیارییەک سەبارەت چارەنووس و جێگەی ڕاگرتنی ئەو چالاکە مەدەنییە لەبەر دەستدا نییە.
جەعفەر ئەمینی پێشتریش لە ڕێکەوتی ٢٣ی ڕەشەمەی ١٣٩٦دا لە کۆبوونەوەیەکی ناڕەزایەتییەکانی خەڵک لە شاری بۆکان لەلایەن هێزە ئەمنییەکانەوە دەسبەسەر کرا و لە ڕێکەوتی ٢٨ی خاکەلێوەی ١٣٩٧دا بە دانانی بارمتە ئازاد کرابوو.
