کارناسانی مافی مرۆڤی نەتەوە یەکگرتووەکان وێڕای هۆشداریدان لە بەرزبوونەوەی بەرچاوی ژمارەی لەسێدارەدانەکان لە ئێران لە مانگی سێپتامبردا داوایان لە کۆماری ئیسلامیی ئێران کرد دەستبەجێ لەسێدارەدانی هەموو ئەو کەسانەی کە حوکمی لەسێدارەدانیان بەسەردا سەپێنراوە ڕابگرێت.
نووسینگەی کۆمیساریای باڵای مافەکانی مرۆڤی نەتەوە یەکگرتووەکان لە ڕاگەیەندراوێکدا کە ڕۆژی دووشەممە ١٢ی خەرمانان بڵاوی کردووەتەوە، ڕایگەیاندووە، بەپێی ئەو زانیارییانەی کە لەلایەن شارەزایانی ئەم دامەزراوەیە کۆ کراونەتەوە و دەستیان کەوتووە، ژمارەی لەسێدارەدانەکان، کە لە مانگی ژوئییەدا کەس ٤٥ بووە، لە مانگی سێپتامبردا دوو هێندە زیادی کردووە و لانیکەم گەیشتووەتە ٩٣ کەس.
لە سەرەتای ئەمساڵەوە ژمارەی لەسێدارەدانەکان لە ئێران ٤٠٠ کەسی تێپەڕاندووە و لانیکەم ١٥ کەس لەو کەسانەی کە لە سێدارە دراون ژنن.
کارناسانی بواری مافی مرۆڤی نەتەوە یەکگرتووەکان لە بەشێکی بەیاننامەکەیاندا دەڵێن: "ئێمە زۆر نیگەرانین لە زیادبوونی بەرچاوی ژمارەی ئێعدامەکان. لە مانگی سێپتامبردا تەنیا ژمارەیەکی کەم لە لەسێدارەدان لەلایەن دامەزراوەکان ڕاگەیەندراوە و ئەمەش تیشک دەخاتە سەر گرینگی و پێویستیی ڕوونکاری لە بڵاوکردنەوەی زانیارییەکان لەم بوارەدا .
نزیکەی نیوەی لەسێدارەدانەکانی مانگی سێپتامبر لانیکەم ٤١ حاڵەتییان پەیوەندییان بە تاوانەکانی پێوەندیدار بە ماددە هۆشبەرەکانەوە هەبووە. هاوکات کۆماری ئیسلامیی ئێران وەک یەکێک لە واژۆکەرانی پەیمانی نێودەوڵەتیی مافە مەدەنی و سیاسییەکان، تەنیا بۆ تاوانی زۆر قورسی وەک کوشتنی بەئەنقەست، بە دەرکردن و جێبەجێکردنی حوکمی ئێعدام بەڕێوە ببات.
