ڕۆژی سێشەممە ١٧ی ڕەزبەر (٨ی ئۆکتۆبری ٢٠٢٤) هەیئەتێکی حیزبی دێموکراتی کوردستانی ئێران پێکهاتوو لە بەڕێزان کاک ڕزگار ئالانی نوێنەری حیزب لە بریتانیا و کاک مەولوود سوارە ئەندامی ڕێبەریی حیزب، بەشداریی یادی دوو ساڵەی بزووتنەوەی ژینایان لە پارلەمانی بریتانیا کرد.
بەشداریی هەیئەتی حیزب لەسەر بانگهێشتی فەرمیی ئازادی نێتوۆرکەوە بوو.
ئەمە دووهەمین جارە کە یادی ٢ ساڵەی بزووتنەوەی ژینا لە پارلەمانی بریتانیا دەکرێتەوە و ئەم یادە لەلایەن سارا ئۆلنی ئەندامی پارلەمانی بریتانیا و ئازادی نێتوۆرک کرایەوە.
لەم کۆبوونەوەیەدا ژمارەیەکی بەرچاو لە ئەندامانی پارلەمان و نوێنەری لێبوردنی نێونەتەوەیی بەشدار بوون و وتاریان پێشکەش کرد.
هەر لە درێژەی ئەم کۆبوونەوەیەدا مێزێکی تایبەت بە نەتەوەکانی ئێران داندرابوو کە کورد و بەلووچەکان لەوێدا دوای پێشکەشکردنی وتارەکان، لەگەڵ بەشداربووانی ئەم کۆبوونەوەیەدا چاویان بە یەکتر کەوت.
هەیئەتی حیزب لەسەر دوایین ڕووداوەكانی ڕۆژهەڵاتی نێوەڕاست و كاریگەریی بزووتنەوەی ژینا و هەروەها نەخش و ڕۆڵی حیزبی دێموكراتی كوردستانی ئێران قسەیان بۆ بەشێكی بەرچاو لەبەشداربووان كرد.
