وڵایەت بیمار
پژمان شەریعەتی
چەند ڕووژیگە "ستاد امر بە معروف و نهی از منکر" ڕێژیم ک سەر وە سپای تروریست پاسدارانە، لە بەش ژنەیل و بنەماڵە، باس لەوە کەن ک توان کلینیکێ تەرک بی حجابی بخەنە ڕێ!
ناو و کردەوە و تەقەلای ڕێژیم لەی ڕاسا بیەسە بایس یە ک کۆمەڵگا قەشمەری وە پێان بکەن و سەریان سڕ مەنێە ک کاروەدەسەیل و لایەنگرەیلێ ئی ڕێژیمە تا چەنیگ بیمارن و گشت هەوڵیان یەسە ک وە هەر ڕیێگ بتۊنن کۆمەڵگا ئازار بیەن.
وە پەی قسەی وەرپرسەیل ئی ستادە، لەو کلینیکە هەوڵ دەن وە موشاورە و دەورەیل دەرمانی، نەخوەشی بی حجابی چارەسەر بکەن.
لێرە چەند خال تیەنە وەر باس:
جیا لە خوەیان گشت کۆمەڵگا وە نەخوەش ڕەوانی دۊنن! یا خاسترە بوشیمن ئەوقەرە بیماری ڕەوانییەگەیان بان گردێە ک گشت وە نەخوەش دۊنن.
ماوەیگە لە ئەدەبیات سیاسی و فەرهەنگی خوەیان هەوڵ دەن، دژبەرەیل دەسەڵات و چالاکەیل سیاسی، مەدەنی و گشت بەشەگان جوور نەخوەش بناسنن، یە لە حاڵیگە ک وەرجە ئی بابەتە چالاکییەگان تەنیا جوور تاوان وەلێان باس کردیان.
خود بابەت حجاب چەندین باس لە خوەی گرێدن:
هەر تاکیک لە دونیای ئمڕووژ حەق سەرەکی خوەیە ک پڕتاڵ و شێواز دەرکەفتن خوەی لە کۆمەڵگا دیاری بکەیدن و هیچ کەس حەق نەیرێد سووکایەتی وە سیما و دڵنگ و خواستەگان تاک بکەیدن و ئەڕای دیاری بکەی چۊ خوەی لە کۆمەڵگا و ژیان شەخسی خوەی دەربخەیدن.
پرس حجاب تەنیا ئەڕای مەرکەز ئیران و ئیدئولوژی دوا کەفتێ ڕێژیم بابەت موهمیگە و لە فەرهەنگ ملەتەیل ترەک ئێران وە تایبەت ئیمەی کورد هیچ وەخت نەیوەسە پرسیگ ک کۆمەڵگا وەخوەیەو سەرقاڵ بکەی و بوودە بەشیگ لە موبارزەی ئازادیخوازانەی کوردستان.
لە لای ترەکیش ڕێژیم جومهوری ئسلامی توای مەیدان موبارزەی ئازادیخوازانە بۊچگەو بکەید و لە ئاست حجاب بوود و ئەوج خواست کۆمەڵگا تەنیا لاوردنێ لەچگێگ بوود و گشت کردەوەیل سیاسی و مەدەنی وە دەور محوەر حجاب بچەرخێد.
خاڵی سەرەکی ترەک لە ساختار و عەقڵیەت ئرتجاعی ڕێژیم، ژن جوور ئنسانیگ کامڵ نیەزانێد و جوور وەسیلە دۊینێدەی.
نەهادەیل وەناو فەرهەنگی ڕێژیم ک لە ڕاسی ماهیەتیگ دژە فەرهەنگ درن و گشتیان سەر وە سازمانەیل نزامی و ترۆریستی ڕژیمن و جوور گروهەیل میلیشیایی لە ژیر ناو ستاد امر بە معروف، جوور گشت ارشاد و پلیس امنیت اخلاقی، عفاف و حجاب و ناوەیل ترەک، گشت هەوڵیان یەسە ک کۆمەلگا نائەمن بکەن و ئی نەخوەشەیل ڕەوانییە شادی و خوەشیان یەسە ک مەردوم ئازار بییەن و بکوشن و بووڕن.
وەختیگ نوڕیدە سەر و سیمایان، ڕەفتار و کردەوەیان، قسە و گەپ و گوفتیان لازم نییە ک ڕەوانشانس بۊیدن، وە ئاسانی ئەڕاد دەرکەفێد ک نەخوەشی دەروونی درن و ئەگەر لە چەو پزشک ڕەوانشناسیگ بنووڕیدە پێان، دەیان جوور بیماری ڕوانی لەو تاکەیلە شناسایی کەید.
کارەسات لێرەسە ک ئی بیمارەیلە، توان ئێمە دەرمان بکەن!
لە ڕاسی ئەوان لە کلینیکەیل تایبەت پەروەردە کریەن، تا هیچ ڕەنگ و بووییگ لە ئنسانیەت وە پیان نەمینێد و جوور گیانلەوەرەیلییگ ک تەنیا وە شێوە لە ئنسان چن، ئامادە کریەن ئەڕای ئازاردان و کوشتن و بڕینێ ئنسانیەت.
گشتیان وەتارێ ڕەهبەریان خومەینی کەن، ک هیچ ئهساس ئنسانیگ نیاشت، گشتمان شنەفتیمنە و دیمنە ک وەختیگ خومەینی سوار هەواپەیما بوود و تیەی ئڕای ئێران، خەبەرنگاریگ وە خومەینی پرسێد، ک دوای ئی هەمکە ساڵە توای بچیدە ئێرانیگ ک ئنقلاب کریاس چ حسیگ درید، خومەینی لە جواو وەت هیچ!
هیچیگ، ک قووڵایی کارەساتەگە نیشان دەی و ئەوج بیماری لە تاکیگ و ئەو نەخوەشیە لە ناو گشتیان ئپیدمی بییە.
ئێرنگە نزیک وە پەنجا ساڵە ک ئی نەخوشیە هاتیەسە ناو ئێران، گشت ملەتەیل ناو ئی جوغرافیا گرفتار کردێە و بیەسە ئازارییگ گشتی و هەر ڕووژ دەردییگ وەی مەردومە زیاد کەن.
بیمارەیلییگ ک وە تاڵ موسەر ئالرژی درن، وە ژن ترسن، ئازادی ئەڕایان مانای مەرگ درێد، ئنسانیەت و کرامەت ئنسانی وەناو زەینیان جیێگ نەیرێد، عداڵەت لە ناو قامووسیان بوونیگ نەیرێد و سەدان بابەت ترەک.
لێرەسە دی هەڵەوگەردێدە سەر خوەمان، ئایا بیلیمن ولایەت بیمار وەسەرمان هەر حوکمڕانی بکەید؟ تەمام ئی ئازارەیلە ک ڕووژانە لە روح و گیانمان دەن هەر تەحەمول بکەیمن؟
تەنیا چارەسەری ئی نەخوەشیە یەسە ک وە ئرادەی بەرز ئنسانی خوەمان موبارزە بکەیمن و ئازادی و کرامەت ئنسانییە ک هەم دەردەیل خوەمان دەوا کەی و هەم ئەو بیمارییە لەبەین بەیدن.
