هاوکات لەگەڵ زۆربوونەوەی ڕێژەی سەرکوتکارییەکان لەلایەن کۆماری ئیسلامییەوە، هەواڵەکان باس لەوە دەکەن کە لە مانگی نۆڤامبری ئەمساڵدا، ڕۆژانە لانیکەم چوار کەس لە بەندیخانەکانی ڕێژیم لە سێدارە دراون.
ڕێکخراوی مافی مرۆڤی ئێران لە نوێترین ڕاپۆرتی خۆیدا بە ئاماژە بە شەپۆلی نوێی لەسێدارەدانەکان لە ئێران، ڕایگەیاندووە کە لە مانگی نۆڤامبردا، لانیکەم ١٤٤ کەس لە بەندیخانەکانی کۆماری ئیسلامیدا لە سێدارە دراون.
بەپێی ڕاپۆرتی ئەم ناوەندە مافی مرۆییە، مانگێک پێشتر واتە لە مانگی ئۆکتۆبردا، کۆماری ئیسلامی بەرزترین ڕێژەی لەسێدارەدانی لە ساڵی ٢٠٠٧ـەوە هەتا ئەمساڵ جێبەجێ کردووە کە ئەم ئامارە ١٦٦ کەس بووە.
بە وتەی ڕێکخراوی مافی مرۆڤی ئێران، ڕێژیمی ئێران لە ژێر سێبەری ئاڵۆزییەکانی ناوچە و سەرنجی کۆمەڵگەی نێونەتەوەیی لەسەر قەیرانەکانی ڕۆژهەڵاتی نێوەڕاست، ڕێژەی لەسێدارەدانەکانی بەرز کردووەتەوە.
بەم حاڵەشەوە تەنیا ٦ حاڵەتی ڕێژەی لەسێدارەدانەکانی مانگی نۆڤامبر لە میدیا فەرمییەکانی ئێراندا ڕاگەیەندراوە کە ئەمە ٤ لەسەدی هەموو سزا جێبەجێکراوەکانە.
لەم ڕیژەیە چوار کەسیان ژن بوون، ٦٦ کەسیان بە تۆمەتی کوشتنی بەئەنقەست و ٧٢ کەسیان لە پێوەندی لەگەڵ تاوانەکانی ماددە هۆشبەرەکان و ٦ کەسیشیان بە تۆمەتی دەستدرێژی سێکسی لە سێدارە دراون.
ئەم ئامارە ١٣ کەسی بەلووچ، ٩ کەسی کورد، ١٢ هاووڵاتیی ئەفغانستانیشی لە خۆ گرتووە.
مەحموود ئەمیری موقەددەم، بەرپرسی ڕێکخراوی مافی مرۆیی ئێران لەمبارەوە ڕایگەیاندووە: بە لەسێدارەدانی لانیکەم ٣١٠ کەس لە دوو مانگی ئۆکتۆبر و نۆڤامبردا، کۆماری ئیسلامی بەربڵاوترین شەپۆلی لەسێدارەدانی لە دوو دەیەی ڕابردوودا لە بەندیخانەکانی ئێران دەست پێ کردووە. زۆربەی لەسێدارەدراوان لانیکەمی ستانداردەکانی دادڕەسیی دادپەروەرانەیان بۆ ڕەچاو نەکراوە و بۆ وەستاندنی ماشینی ئیعدامی حکوومەت، هەوڵی خێرای کۆمەڵگەی جیهانی پێویستە.
کۆمیتەی سێهەمی کۆڕی گشتیی نەتەوە یەکگرتووەکان لە ڕۆژی یەکی سەرماوەزی ئەمساڵدا، پێشنووسی بڕیارنامەی "دۆخی مافی مرۆڤ لە کۆماری ئیسلامی ئێران"ی پەسەند کرد.
ئەم بڕیارنامەیە بە ٧٧ دەنگی ئەرێنی، ٢٨ دەنگی نەرێنی و ٦٦ دەنگی بێلایەن پەسەند کرا کە بەرزبوونەوەی جێگای نیگەرانیی سزای لەسێدارەدان لە ئێرانی بەپێی دانپێدانانی زۆرەملێ و بە بێ تێپەڕاندنی ڕەوتی دادپەروەرانەی دادوەری، مەحکووم کرد.
ڕێژیمی ئێران پەسەندکردنی ئەم بڕیارنامەی بە هەوڵێکی "ڕقاوی و لەسەر بنەمای سیاسی" ناو برد و ڕەتی کردەوە.
