دوایین ڕاپۆرتەکان سەبارەت بە دۆخی مافی مرۆڤ لە ئێران ئاماژە بە بەردەوامیی گرتن و سەرکوتکردنی چالاکوانان و ناڕازییانی کورد، عەرەب و بەلووچ دەکەن.
ڕاپۆرتی دۆخی مافی مرۆڤ لە ئێران لە مانگی بەفرانباری ئەمساڵ نیشانی دەدات کە سەرکوتەکان هێشتا بەردەوامن و بەپێی دوایین ئاماری هەواڵدەریی هێرانا، کۆی گشتیی ئەو پێشێلکارییانەی کە ڕاپۆرت کراون، ئاماژە بە "دۆخێکی نیگەرانکەر و بەپەلە بۆ سەرنجی نێودەوڵەتی و ڕێژیمی ئێران'' بەم پرسانە دەکەن.
ئەم حاڵەتانە، جێبەجێکردنی سزای لەسێدارەدان، سەرکوتکردنی بەربڵاوی ئازادیی ڕادەربڕین و دەسبەسەرکردنی سەرەڕۆیانە، خۆکوشتن بەهۆی گوشار و بێهیوایی لەنێو منداڵان و لاوان، زیادبوونی مەترسیداری قەتڵە نامووسییەکان، توندوتیژی دژی ژنان، بەردەوامیی پێشێلکردنی مافەکانی کرێکاران و زێدەڕۆیی لە بەکارهێنانی هێز لەلایەن هێزەکانی ئینتزامی و ئەمنییەتی لە خۆ دەگرێت.
ڕێکخراوی چاودێری مافی مرۆڤی ئێران لە ڕاپۆرتی ساڵانەی خۆیدا سەبارەت بە بارودۆخی وڵاتانی جیاجیا لە کۆتایی مانگی بەفرانباری ئەمساڵدا ڕایگەیاند کە دۆخی مافی مرۆڤ لە ئێران لە ساڵی ٢٠٢٤دا خراپتر بووە.
لە لایەکی دیکەوە، بە پێی ڕاپۆرتەکان، لە مانگی بەفرانباری ڕابردوودا تەنیا لە ماوەی پێنج ڕۆژدا دەیان چالاکی عەرەب لە شارە جیاجیاکانی خووزستان دەسبەسەر کراون.
هەروەها دوابەدوای مانگرتنە گشتییەکان لە کوردستان، ژمارەیەکی زۆر لە هاووڵاتییان دەسبەسەر کران.
هەروەها کەمپەینی چالاکوانانی بەلووچ دەسبەسەرکردنی لانیکەم ٣٨ هاووڵاتیی بەلووچی لە شاری زاهێدان لە ١٨ی بانەمەڕدا ڕاگەیاند.
هادی قائێمی بەڕێوەبەری کەمپەینی مافی مرۆڤی ئێران ئەم دۆخەی بە "چڕبوونەوەی هەڵمەتی دڕندەیی و تۆقاندنەکانی کۆماری ئیسلامی" لە دژی چالاکانی کەمینە نەتەوەییەکان ناو بردووە.
