هەیئەتێکی کومیتەی حیزبی دێموکراتی کوردستانی ئێران لە وڵاتی بیلژیک بەشدارییان لە سێمینارێکدا کرد کە بۆ باس لەسەر ڕۆژاوای کوردستان و ئەگەر و پێشهاتەکانی پێوەندیدار بەو بەشەی کوردستان تەرخان کرابو.
ئەم سێمینارە کە لەلایەن هەر دوو پارتی یەکیەتی دێموکراتی کورد لە سووریە و پارتی پێشڤەڕۆی کورد لە سووریە بۆ هەر دوو بەڕێزان کاک حەبیب ئیبراهیم بەرپرسی گشتیی دەرەوەی وڵاتی پارتی یەکیەتیی دێموکراتی کورد لە سووریە و بەڕێز سەلمان هودسۆ بەرپرسی گشتیی ئورووپای پارتی پێشڤەڕۆی کورد لە سووریە پێکهاتبوو .
مژاری یەکەمی سێمینارەکە تەرخان کرابوو بۆ پێشکەشکردنی باس لەسەر گرینگیی یەکڕیزیی پارتەکانی ڕۆژاوا بۆ گفتوگۆ و دیالۆگ لەگەڵ حکوومەتی نوێی دەمیشق و زیانەکانی بەجیاجیا چوونی پارتەکان بۆ گفتوگۆ لەگەڵ دیمشق کە لەلایەن کاک سەلمان هودسۆ پێشکەش کرا.
پاشان کاک حەبیب ئیبراهیم باسێکی تێر و تەسەلی لەسەر کاریگەرییەکانی بانگەوازی ڕێزدار عەبدوڵڵا ئوجالان لەسەر ڕەوشی ڕۆژاوای کوردستان و هەڵوێست و نێرینی پارتی کریکارانی کوردستان و ئوپۆزسیونی ناوخۆیی تورکیە لەسەر ئەو بانگەوازە و ئامانجی گشتی لە ڕوانگەی دەوڵەتی تورکیەو پارتەکانی بەنسبەت ئەو بانگەوازە پێشکەش کرد .
لە بەشێکی دیکەی سێمینارەکەدا داوا لە بەرپرسی گشتیی کۆمیتە بەڕێز بەها ئیبراهیمی کرا کە باسێک لەسەر ڕەوشی ئێستای ڕۆژهەڵاتی کوردستان پێشکەشی ئامادەبووان بکات.
بەرێزیان جیا لە باسکردن لە ڕەوشی ئێستای ئێران و ڕوانگەی دنیا و وڵاتانی ناوچە بە نیسبەت ئێرانەوە لە پاش ڕووداوەکانی دوای ٧ی ئۆکتۆبری پارەکە و هەڵوەشانەوە و شکستی مێحوەری مقاومەت و پرۆژەی هیلالی شیعە ئاوڕێکی کورتی لەسەر داڕمانی ئابووری و کۆمەڵایەتی و سیاسی لە ئێران کرد کە بێگومان ڕۆژ لە دوای ڕۆژ ئەو ڕێژیمە و پرۆژەکانی بەتەواوەتی لە لەگۆڕنان نزیک ئەکاتەوە و .هەوڵدانی ڕێژیم وەک دوایین پەلەقاژەی پێش مەرگ و ڕووخان بۆ پێشگرتن لە نەورۆزی خاکیپۆشانی جامانە لەمل بۆ بەشداران شی کردەوە
لە درێژەی سێمینارەکە هەر یەک لە بەڕێزان کاک مەزڵووم دەلی وەک بەرپرسی پارتی سۆسیالیستی باکوور و بەڕێز ناسک نەسیری وەک چالاکی کاروباری ژنان باسێکی لەسەر نەورۆز لە ڕوانگەی ناوەندە کولتورییەکانی بێلژیک و یوونسکۆ و ئەرکی دیاسپۆرای کوردی لەم وڵاتە بۆ زیاتر ناساندنی نەورۆز بە بێلژیکییەکان و باسێکی لە سەر ٨ ی مارس ڕۆژی جیهانیی ژنان پێشکەش کرد .
