کاک مستەفا هیجری، سکرتێری گشتیی حیزبی دێموکراتی کوردستانی ئێران، بە بۆنەی بەڕێوەچوونی شکۆمەندانەی نەورۆزی خاکیپۆشان، پەیامێکی بڵاو کردەوە.
دەقی پەیامەکە بەم چەشنەیە:
کوردستانییانی هێژا !
کچان و کوڕانی بەهەست و کۆمەڵگەی خەباتگێڕی کوردستان !
ئێوەی ئازادیخواز، لە ماکۆوە هەتا ناوچەکانی باشووری زاگرۆس، بە پشتیوانیتان لە بانگەوازی ڕێکخراوە مەدەنییەکانی ڕۆژهەڵاتی کوردستان سەبارەت بە نەورۆزی خاکیپۆشان؛ بە بەڕێوەبردنی چالاکانە و بەربڵاوی ڕێوڕەسمەکانی جێژنی سەری ساڵی نوێ و نەورۆزی کوردەواری، هاوخەباتیییەکی بێ‌وێنەتان لە خۆتان نواند.
سەرەڕای کەشی سەرکوت و بەربەستەکانی ڕێژیمی کۆماری ئیسلامی، بەم کردەوە جەماوەرییەتان، پێگەیشتوویی سیاسی و وشیاری نەتەوەیی خۆتان سەلماندەوە و جارێکی دیکەش نیشانتان دا کە پێداگری و ئیرادەی یەکگرتووی نەتەوەی کورد لەپێناو ناسنامە و مافە نەتەوەییەکانی خۆی، سەرمایەیەکی گەورە و هێزێکی لەشکاننەهاتووە بەرانبەر بە دەسەڵاتی خۆسەپێن.
ئێمەش بە چاوی ڕێزەوە دەڕوانینە خۆڕاگری و هاوخەباتیتان؛ ژیانتان تەژی لە خۆشی و شادی بێت و یەکڕیزیتان هەر وا بەردەوام.
مستەفا هیجری
سکرتێری گشتیی حیزبی دێموکراتی کوردستانی ئێران
٦ی خاکەلێوەی ١٤٠٤ی هەتاوی
٢٦ی مارسی ٢٠٢٥ی زایینی
