ڕۆژی یەکشەممە ١٠ی خاکەلێوەی ١٤٠٤ (٣٠ی مارسی ٢٠٢٥)، بەبۆنەی ١٠ی خاکەلێوە ساڵڕۆژی لەسێدارەدانی پێشەوای مەزن و هاوڕێیانی، کە وەک ڕۆژی شەهیدانی کوردستان دیاری کراوە، لەلایەن کۆمیتەی ئوتریشی حیزبەوە کۆرێک بۆ ڕێزلێنان لە شەهیدانی کوردستان بەڕێوە چوو.
ڕێوڕەسمەکە بە خوێندنەوەی سروودی نەتەوایەتیی ئەی ڕەقیب و ڕاگرتنی خولەکێک بێدەنگی بۆ ڕێزگرتن لە گیانی پاکی شەهیدان و بە تایبەتی شەهیدانی ١٠ی خاکەلێوە دەستی پێ کرد.
پاشان کاک حوسێن خاڵخاڵ، وەک بەڕێوەبەری کۆڕەکە وێڕای بەخێرهاتنی بەشداربووان و باسێکی کورتی لەسەر ١٠ی خاکەلێوە پێشکەش کرد.
دواتر پەیامی کۆمیتەی حیزبی دیمۆکراتی کوردستانی ئێران لەلایەن خاتوو مونیرە نیگەهدار بەرپرسی کۆمیتەی حیزب لەو وڵاتە پێشکەش کرا.
ناورۆکی پەیامی حیزب باسێک لە توانایی و گەورەی ڕێبەری شەهید قازی محەممەد و لێزانی و لێهاتوویی ناوبراو لەو کات و سەردەمەدا بوو، کە دوای نزیکەی ٨ دەیەش لە تێپەڕینی ئەو تاوانە گەورەیەی دووژمنانی نەتەوەی کورد، بیر و هزری پێشەوای کوردان هەروا بەڕۆژە و ئەرزشە سیاسی و کۆمەڵایەتی و فەرهەنگییەکانی ئەو بناخەی داناون، بە تایبەتی لە ڕۆژهەڵاتی نیشتمان بە میلیۆنان تێکۆشەری ئاویتەی ئەو ڕێ و ڕێبازە کردووە، ئەوەش لە نەورۆزی خاکیپۆشانی ئەمساڵدا لە هەموو کات زیاتر خۆی نواند و دوژمنانی ڕێگا و ڕێبازی پێشەوا قازی محەممەدی زەبوون و داماو کرد.
کوڕگێڕی ئەم بۆنەیە، کاک دوکتۆر سەدیق زەرزا بابەتێکی بە پێزی پێشکەش کرد و پاشان پەیامی پارتی دیمۆکراتی کوردستان لەلایەن کاک سامان عوسمان نوێنەرایەتیی ئەو پارتەوە خوێندرایەوە.
لە بڕگەی کۆتاییدا، محەممەد فەقێ‌عەلی ناوی ئەو حیزب و ڕێکخراوانەی خوێندەوە، کە پەیامیان گەیاندبوو بە هاوڕێیانی حیزبیمان و نوێنەرایەتییان بەشداری ئەم یادە بوون، کە بریتی بوون لە:
پارتی دیمۆکراتی کوردستان، پارتی سوسیالیستی کوردستان (پاسۆک)، ئەنجومەنی نیشتمانیی کورد لە سووریە (ئەنەکەسە)، پارتی ئازادی کوردستان (پاک)، پارتی دیمۆکراتی کوردستانی سووریە، حیزبی شیوعی کوردستان، پارتی دیمۆکراتی پێشوەڕۆی کوردی سووریە، پارتی یەکیەتی کوردی سووریە، پارتی یەکیەتی دیمۆکراتی کوردی سوریە، ڕێکخراوی کوردانی یارسانی و لالش، ڕێکخراوی کوردانی ئیزەدی.
