لە دوای بەڕێوەچوونی ڕێوڕەسمی بەشکۆی نەورۆزی خاکیپۆشان لە ناوچەی دەڕەشار و پەهلەی ئیلام، هاووڵاتییەکی کورد دەسبەسەر و دەیان کەسی دیکە بانگی ناوەندە ئەمنییەکانی ڕێژیم کراون و هەڕەشەیان لێ کراوە.
بەپێی ڕاپۆرتی ڕێکخراوی مافی مرۆڤی "هەنگاو"، ڕۆژی چوارشەممە ١٣ی خاکەلێوە هاووڵاتییەکی کورد بە ناوی "فەرزاد عەبدی" خەڵکی پەهلە سەر بە ناوەندی بەشی زەڕیناوای شاری "دێهلوڕان"، دوای تەواوبوونی ڕێوڕەسمی نەورۆز لەو شارە، لەلایەن ناوەندە ئەمنیەتییەکانی ڕێژیمی ئێرانەوە دەسبەسەر کرا.
هێزە ئیتلاعاتییەکانی ڕێژیم لە کاتی دەسبەسەرکردنیدا بە توندی لەو هاووڵاتییەیان داوە کە بووەتە هۆی شکاندنی دەستێکی.
ناوبراو دوای دەسبەسەرکرانی بۆ شوێنێکی نادیار گواستراوەتەوە و بەدواداچوونەکانی بنەماڵەکەی سەبارەت بە چارەنووس و شوێنی ڕاگرتنی بێ ئەنجام ماوە.
هەروەها لە ماوەی ڕۆژانی ڕابردوودا بە دەیان هاووڵاتیی کوردی خەڵکی شاری دەڕەشار بە هۆی بەشداریی چالاکانەیان لە نەورۆزی خاکیپۆشانی ئەم شارەدا بۆ بانگی ئیتلاعات کراون و هەڕەشەیان لێ کراوە.
ڕۆژی دووشەممە ١١ی خاکەلێوە، سەرەڕای ڕێگریکردنی هێزەکانی ڕێژیم، بە ئامادەبوونی بەشکۆی خەڵکی زاگرۆس، نەورۆزی کوردەواری لە دەڕەشار بەڕێوەچوو.
