کۆبوونەوەی کاک مستەفا هیجری لەگەڵ بنەماڵەی سەربەرزی شەهیدان
کاک مستەفا هیجری، سکرتێری گشتیی حیزبی دێموکراتی کوردستانی ئێران بە بۆنەی ١٠ی خاکەلێوە، ڕۆژی شەهیدانی کوردستان، لەگەڵ ژمارەیەک لە ئەندامانی بنەماڵەی سەربەرزی شەهیدان کۆ بوویەوە و وتارێکی لەژێر ناوی ''کەسایەتی شەهید و ڕۆڵ و کاریگەری بنەماڵەکانی سەربەزی شەهیدان لە بزوتنەوەی کورد بە گشتی و حیزب بە تایبەتی'' پێشکەش کرد.
ئەم کۆبوونەوەیە ڕۆژی هەینی ١٥ی خاکەلێوەی ١٤٠٤، بە بەشداریی ژمارەیەک لە ئەندامانی ڕێبەریی حیزبی دێموکرات و بنەماڵەی سەربەرزی شەهیدانی حیزبی دێموکرات و لەلایەن بەشی شەهیدانی ناوەندی کۆمەڵایەتیی حیزبی دێموکراتەوە بەڕێوە چوو.
کۆبوونەوەکە بە سروودی نەتەوایەتیی ئەی ڕەقیب و ڕاگرتنی چەند ساتێک بێدەنگی بۆ ڕێزگرتن لە گیانی پاکی شەهیدانی کورد و کوردستان دەستی پێ کرد.
پاشان لەلایەن مەحبووبە ئیبتکار، پێشکەشکارەوە بەخێرهاتنی بەشداربووان کرا.
دواتر بەڕێز مستەفا هیجری سکرتێری گشتیی حیزبی دێموکراتی کوردستانی ئێران لەسەر ''کەسایەتی شەهید و ڕۆڵ و کاریگەریی بنەماڵەکانی سەربەزی شەهیدان لە بزووتنەوەی کورد بە گشتی و حیزب بە تایبەتی'' وتارێکی پێشکەش کرد.
کاک مستەفا هیجری لە سەرەتای قسەکانیدا ئاوڕێکی لە ١٠ی خاکەلێوەی ساڵی ١٣٢٦ دایەوە کە پێشەوا قازی محەممەد و هاوڕێیانی لەلایەن ڕێژیمی پەهلەوەییەوە بە ناڕەوا لە سێدارە دران.
کاک مستەفا وتی کە ڕێژیمە دیکتاتۆڕەکان بە تایبەت کۆماری ئیسلامی لە بەرامبەر ویست و داخوازیی خەڵک تەنیا دەست بۆ ئێعدام و زیندان و سەرکوت دەبەن و بەو شێوەیە دەیانهەوێت دەنگی خەڵک کپ بکەن، بەڵام سەڕارەی هەمووی ئەوانە خەڵک دەنگی ئازادیخوازیی خۆیان بە شێوەی جۆراجۆر وەکوو خۆپیشاندان، مانگرتن و بایکۆت بەرزتر کردووەتەوە.
خەڵکی کوردستان بە تایبەتی لە هەموو بۆنە و دەرفەتەکان کە دوایین نموونەی نەورۆزی خاکیپۆشان بوو بەهێزتر لە جاران پەیامی خۆیان نیشان داوە و خۆڕاگریان کردووە و لەو خۆڕاگرییەدا بنەماڵەی شەهیدان پشکی شێریان وەبەرکەتووە و بەهێزتر و خۆڕاگرتر لە جاران لە مەیداندا بوون.
بەڕێز هیجری لە قسەکانیدا ئاوڕێکی لە زەبر و زەنگی ڕێژیم بەرامبەر بە ژنان دایەوە کە سەڕەڕای هەوڵەکانی ڕێژیم وەکوو سەپاندنی یاسای حیجابی زۆرەملێ، ژنان توانیان بە خۆڕاگری چۆک بە ڕێژیم دابنێن و بە دانانی سەرپۆش و بەشداری لەو ڕێوڕەسمانە هێزی خۆیان نیشان بدەن.
ناوبراو وتی: "ئێمە لە حاڵێکدا ئەو بۆنەیە یاد دەکەینەوە کە کۆماری ئیسلامی لە خراپترین دۆخی خوێدایە. لە سەرەتای هاتنەسەرکاری ئەو ڕێژیمە، بە سیاسەتی هەناردەکردنی شۆڕش و دوژمن داتاشین بۆ خۆی، لە ڕاستیدا لە سەردەم دابڕا و هەموو هەوڵ و هیوای بەو سیاسەتەی کە دایڕشتبوو یەک لە دوای یەکدا هەڵوەشایەوە. بە سەدان میلیارد دۆلاری خەرجی هێزە نیابەتییەکان لە وڵاتانی ناوچە کرد، بەڵام لە ژێر هێرش و گوشاری ئیسرائیل لەنێو چوو.
سکرتێری گشتیی حیزب باسی لەوە کرد کە لە نێوخۆی وڵاتدا وێڕای ئەوەیکە خەڵک لە کۆماری ئیسلامی دابڕاوە و لە نێو دەسەڵاتیشدا چند بەرەکی و لێکترازان پەیدا بووە. دۆخی ئابوورییەکەی بەڕەو داڕمان چووە و ڕێژیم لە ڕێگەی سەرکوتەوە خەڵکی ماتەم و برسی ڕاگرتووە. لەو حاڵەدا کۆماری ئیسلامی هیچ ڕێگەچارەیەکی نەماوە، بەڵام هەر دەیهەوێت سیاسەتی پێشووی خوێ درێژە بدات.
لە ئێستادا کۆماری ئیسلامی لە بنبەستێکی واقعیدا گیری کردووە و لەژێر هەڕەشەکانی ئامریکا و ئیسرائیل دوو ڕێگای لەبەرە؛ یان دەبێ ویستی ئەوان قەبووڵ بکات، لەڕاستیدا ئاوا کۆماری ئیسلامی لە بنیاتەکانی خۆی لێک دەترازێت هەر وەکوو ئەوەیکە خەونەکانی پووچەڵ بوونەوە. ئەگەریش مل ڕانەکێشت بۆ ویستەکانی ئامریکا هەڕەشەی جیددی لە سەرە؛ بۆیە کۆماری ئیسلامی لە هەر دوو لاوە دۆڕاوە و هەرچی ئەو ڕێژیمە لاوازتر بێ دەرەتانی خەبات بۆ ئێمە بەرفراوانترە.
ناوبرا وتی: ''ئێستا بەو هیوایەوە دەڕوانینە داهاتوو کە بەنیسبەت ڕابردوو هیوامان زۆرترە و پێویستە خەڵکی ئێمە لە مەیداندا بن و بنەماڵەی شەهیدانیش هەروا ورەبەخشتر بن. هیوادارم زۆر نەکێشێت و خەڵکی کوردستان بەتایبەت بنەماڵەی شەهیدان بەو ئاواتە بگەن کە قوربانییان داوە و ساڵانێکە ئازار و سەختی دەکێشن و ڕزگارییان بێت.''
سکرتێری گشتیی حیزبی دێموکرات لە کۆتاییدا وتی: ''بەو هیوایە ساڵی نوێ دەست پێ دەکەین و خەباتی خۆمان پتەوتر دەبەینە پێش و دڵخۆشین کە حیزبی دێموکرات لە نێو دڵی خەڵکدایە و بە یەکدەنگی، شانبەشانی خەڵکی ئازادیخوازی ئێران درێژە بە خەبات دەدەین. ئێمە بەهێزین و بە مووشەک و بۆمباران چۆک دانادەین و درێژە بە ڕێبازی شەهیدان دەدەین، سەرکەوتن بۆ خەڵکە و نەمان بۆ کۆماری ئیسلامییە.''
لە بڕگەی کۆتایی ڕێوڕەسمەکەدا بەشداربووان سەردانی پێشانگای شەهیدانیان کرد و لەوحی ڕێزلێنان پێشکەشی بنەماڵەی شەهیدان کرا.
