دەستەی کارگێڕیی حیزبی دێموکراتی کوردستانی ئێران، بە بۆنەی ١٠ی خاکەلێوە، ڕۆژی شەهیدانی کوردستان، ڕێزنامەیەکی بۆ ڕێزگرتن لە بنەماڵەی سەربەرزی شەهیدانی حیزبی دێموکرات، پێشکەش کردن.
ئەم ڕێزنامەیە هاوکات لەگەڵ کۆبوونەوەی بەڕێز کاک مستەفا هیجری، سکرتێری گشتیی حیزبی دێموکراتی کوردستانی ئێران لەگەڵ بەشێک لە بنەماڵەی سەربەرزی شەهیدان، پێشکەشیان کرا.
دەقی ڕێزلێنانەکە بەم چەشنەیە:
بنەماڵەی سەربەرزی شەهیدان!
ڕەوتی بەرەوپێشچوونی جووڵانەوەی ڕزگاریخوازیی کورد بەرھەمی گیانبازی و لەخۆبردوویی ڕۆڵە خەباتکار و تێکۆشەرەکانیەتی، کە لەپێناو ئازادی و سەرخستنی بزووتنەوەکەدا خۆنەویستانە گیان و ژیانی خۆیان بەختی ئەم ئامانجە کردووە.
بەردەوامیی خەباتی نەتەوەکەمان لە ڕۆژھەڵاتی کوردستان لە دوای ڕووخانی کۆماری کوردستان و شەهیدکرانی پێشەوای سەرکۆمار و پەرەسەندنی بیری نەتەوایەتی و خەباتی شوناسخوازیی ئەم گەلە، بێگومان بەرھەمی گیانفیدایی کەسانێکە، کە لە سەنگەرەکانی پارێزگاری لە مان و بوونی ئەو گەلەدا بە سەخاوەتەوە گیانیان بەخشیوە و ئاڵای خەباتی نەتەوەکەیان شەکاوه ڕاگرتووە.
حیزبی دێموکراتی کوردستانی ئێران لە ڕۆژی ١٠ی خاکەلێوە، ڕۆژی شەهیدانی کوردستاندا، وێڕای ناردنی سڵاو بۆ گیانی پاکی هەموو شەهیدانی کوردستان، قەدر لە بنەماڵەی سەربەرزی شەهیدان دەگرێت و سڵاو بۆ باوەڕ و خۆڕاگرییان دەنێرێت.
ئێمە هەر لە ڕێبەرانی شەهیدمانەوە فێر بووین کە "باشترین پاداش بۆ شەهیدان، درێژەدانـی ڕێگەیانە"، بۆیە لەو ڕۆژەدا وێڕای بەرزڕاگرتنەوەی یادی شەهیدان، پەیمانیان لەگەڵ نوێ دەکەینەوە، هەتا وەدیهاتنی ئامانجەکانیان کە ئازادی و ڕزگاریی کوردستانە، لە سەنگەری ئەم خەباتە ڕەوایەدا دەمێنینەوە و درێژەدەری ڕێبازی ڕزگارییان دەبین.
سڵاو لە شەهیدانی کوردستان
سڵاو لە بنەماڵەی سەربەرزی شەهیدان
حیزبی دێموکراتی کوردستانی ئێران
دەستەی کارگێڕی
١٠ی خاکەلێوەی ١٤٠٤ی هەتاوی
