ڕۆژی شەممە ٩ی خاکەلێوەی ١٤٠٤ (٢٩ی مارسی ٢٠٢٥)، بە بەشداریی ئەندامانی حیزب لە فینلاند، لە شاری تامپێرێ، ڕۆژی شەهیدانی کوردستان بەرز ڕاگیرا.
سەرەتای ڕێورەسمەکە بە سروودی نەتەوەیی ئەی ڕەقیب و ڕاگرتنی خولەکێک بێدەنگی بۆ ڕێزگرتن لە گیانی پاکی شەهیدانی کوردستان دەستی پێ کرد.
پاشان پەیامی ناوەندی کۆمەڵایەتیی حیززبی دێموکراتی کوردستانی ئێران، لەلایەن خاتوو شەهین سۆلتانیەوە پێشکەش کرا .
لە بڕگەیەکی دیکەی ڕێوڕەسمەکەدا بەشێک لە وەسیەتنامەی پێشەوای نەمر خوێندرایەوە.
بەشێک لە بەشداربووان بیرەوەریان لە سەر هاوسەنگەران و هاو زیندانییانی شەهیدیان گێڕایەوە.
هەروەها لە ڕۆژی ١٠ی خاکەلێوە ڕۆژی شەهیدانی کوردستاندا بە ئامادەبوونی بنەماڵەی سەربەرزی شەهیدان و ئەندامان و دۆستانی حیزب لە کۆمیتە ناوچەی یوڤەسکولە یادی شەهیدانی کوردستان بەرز ڕاگیرا.
لە سەرەتای ڕێووڕەسمەکەدا بەرپرسی کۆمیتە کاک فازڵ سوڵتانپەنا بەخێرهاتنی بەشدارانی کرد و وەسیەتنامەی پێشەوا قازی محەممەدی بۆ بەشداران خوێندەوە.
پاشان بەڕێز ئەمیر سوڵتانپەنا کوڕی شەهید ئاغا عەلی، شێعرێکی پێشکەش بە ئامادەبووان و یادی ١٠ی خاکەلێوە کرد.
لە درێژەی یادی شەهیداندا ڕۆژی یەکشەممە ۱۰ی خاکەلێوەی ۱٤۰٤، لەلایەن کۆمیتە ناوچەی تورکو بە بەشداریی بنەماڵەی سەربەرزی شەهیدان، ئەندام و لایەنگرانی حیزب و کوردانی دانیشتووی تورکو بە بۆنەی ۱۰ی خاکەلێوە ڕێوڕەسمێکی بەشکۆ بۆ ڕێزگرتن لە شەهیدانی کورد و کوردستان بەڕێوە چوو.
ڕێورەسمەکە بە سروودی نەتەوایەتیی ئەی ڕەقیب و ڕاگرتنی ساتێک بێدەنگی بۆ ڕێزگرتن لە گیان پاکی شەهیدانی کوردستان دەستی پێ کرد.
پاشان چەندین پەیام و بابەتی پێوەندیدار بە ۱۰ی خاکەلێوە ڕۆژی شەهیدانی کوردستان پێشکەش بە ئامادەبووان کرا کە بریتی بوو لە :
پەیامی ناوەندی کۆمەڵایەتیی حیزبی دێموکرات بە بۆنەی ڕۆژی شەهیدان لەلایەن هاوڕێ کاک کەریم ڕەسووڵی .
پەیامی بنەماڵەی شەهیدان بە بۆنەی ۱۰ی خاکەلێوە لەلایەن خاتوو مەهتاب محەممەدیان
بابەتێکی لێکۆلینەوەیی لەسەر کاک عەزیز یووسفی لەلایەن هاوڕێ شوانە ڕەزگەیی
پارچە موزیکێک بە دەست و پەنجە ڕەنگینەکانی هونەرمەندی لاو دیار میرسەیدی
پارچە شێعرێک بە ناوی (پێشەوا) لەلایەن کامیل شەخسی
خاتوو شنە ڕەزایی بەڕێوەبەر، بە پێشکەشکردنی چەندین کۆپلە شێعر کۆڕەکەی ڕازاوەتر و دەوڵەمەندتر کرد.
خاتوو مەرزە دەروێشی وەک ئەمەگ و وەفا بۆ شەهیدانی حیزب و گەل بە هونەرنەمایی خۆی وێنەی ڕێبەرانی شەهیدی لە قالبی تابڵۆیەکدا پێشکەش بە ڕێوڕەسمی یادی ۱۰ی خاکەلێوە کرد .
هەروەها لقی تورکوی پارتی دێموکراتی کوردستان و ڕێکخراوەکانی یەکیەتیی ژنانی دێموکرات و فینکورد بە بۆنەی ۱۰ی خاکەلێوە پەیامیان ناردبوو.
ڕێوڕەسمەکە بە سروودی ئەی شەهیدان، کۆتایی پێ هات .
