ڕۆژی هەینی ٢٠ی پووشپەڕی ١٤٠٤، کاک ئەحمەد نووری ئەندامی حیزبی دێموکراتی کوردستانی ئێران بە هۆی نەخۆشیی شێرپەنجە ماڵاوایی لە ژیان کرد.
کاک ئەحمەد نووری ساڵی ١٣٥١ لە ئاوایی بزمیراوای داڵاهۆ و لە بنەماڵەیەکی شۆڕشگێڕ و کوردپەروەری باوەڕمەند بە ئایینی یارسان لە دایک بووە.
ناوبراو بە هۆی دەستکورتیی بنەماڵەکەی تەنیا توانیویەتی تا پۆلی پێنجی سەرەتایی لە شاری سەرپێڵی زەهاو بچێتە قوتابخانە، پاشان بۆ هاوکاریی بنەماڵەکەی و بەدەستهێنانی بژیوی ژیان خەریکی کاری وەرزێڕی بووە.
کاک ئەحمەد لە ڕێگەی ئەو قسە و باسانەی کە لە خەڵک و بنەماڵەکەیان لەسەر حیزبی دێموکرات و شەخسی دوکتور قاسملوو گوێی لێ بووە هۆگریەکی زۆری بە حیزبی دێموکرات پەیدا کردووە و و تەبلیغی بۆ کردووە.
کاک ئەحمەد نووری لە ساڵی ١٣٧٢ی هەتاویدا یەکەمین پەیوەندی تەشکیلاتیی بە شێوەی ڕەسمی و ئۆرگانیک دادەمەزرێنێ و دەبێتە ئەندامی حیزبی دێموکراتی کوردستانی ئێران و لە ساڵی ١٣٧٨ لە کاتی چالاکی و تەبلیغ بۆ حیزبی دێموکرات ڕاپۆڕتی لێ دەدرێت و لەلایەن ئیدارەی ئیتلاعاتی سەرپێڵی زەهاو دەسبەسەر دەکرێ و بۆ ماوەی حەوت ڕۆژ ئەشکەنجە و ئازاری دەدەن، هەموو لێپرسینەوەکانی لەسەر هاوکاریکردنی حیزبی دێموکرات بووە و پاش شکەنجە و ئازاردانێکی زۆر کاتێک دان بە هیچ شتێکدا نانێ بە دانانی بارمتە لە زیندان ئازادی ئەکەن.
ناوبراو ١٩ ساڵە ڕووی لە وڵاتی فینلاند کردووە و لەوێش وەک ئەندامێکی چالاک درێژەی بە ئەرکی حیزبایەتیی خۆی داوە و لە کۆڕ و کۆبوونەوە حیزبییەکان و خۆپیشاندانەکاندا بەشداریی کردووە و زۆر ڕاشکاوانە بیروڕای خۆی باس کردووە.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
