سکرتێری گشتیی حیزبی دێموکراتی کوردستانی ئێران بە بڵاوکردنەوەی پەیامێک، دەرکرانی مووسەویان لە زانکۆی پرینستۆنی ئەمریکای بە هەنگاوێکی گرینگ دژی سیاسەتی سەرکوت و تێرۆریزمی دەوڵەتیی کۆماری ئیسلامی ناو برد. سەی حوسێن مووسەویان، باڵوێزی پێشووی کۆماری ئیسلامی لە ئاڵمان یەکێک لە جێبەجێکارانی تێرۆری میکۆنووس بوو.
دەقی پەیامەکەی کاک مستەفا هیجری بەم چەشنەیە:
هەواڵی دەرکرانی سەید حوسێن موووسەویان، باڵوێزی پێشووی ڕێژیم لە ئاڵمان و ئەندامی پێشووی تیمی دانوستانکاری ناوکیی کۆماری ئیسلامی لە زانکۆی پرینستۆنی ئەمریکا، مایەی خۆشحاڵییە.
مووسەویان بۆ ماوەی ١٥ ساڵ، وەکوو کارناسی ئەمنییەتی ڕۆژهەڵاتی نێوەڕاست و سیاسەتی ناوکی، لە بەرنامەی ئەمنییەت و زانستی جیهانیدا چالاک بوو و ئەمەش ببووە هۆی ناڕەزایەتیی بەردەوامی چالاکانی سیاسی و ناوەندە مافی مرۆییەکان.
مووسەویان لە کاتی تێرۆرکرانی دوکتور سادقی شەرەفکەندی، سکرتێری پێشووتری حیزبی دێمووکراتی کوردستانی ئێران و هاوڕێیانیدا، باڵوێزی کۆماری ئیسلامیی ئێران لە ئاڵمان بوو، و ناوی مووسەویان هەمیشە لەگەڵ تێرۆرەکان لە دەرەوە هاتووە؛ بەشێوەیەک کە ناوبراو لە تێرۆری ٢٤ کەس لە کەسایەتییەکانی ئۆپۆزسیۆنی ڕێژیم لە دەیەکانی ١٣٦٠ و ١٣٧٠دا و یەک لەوان لە تێرۆری دوکتور شەرەفکەندی و شاندی هاوڕێیان دەستی هەبووە.
دەرکردنی مووسەویان، هەنگاوێکی گرینگە لەپێناو سەرخستنی ئەو هەوڵانەی دژی سیاسەتی سەرکوتکاری و تێرۆریزمی کۆماری ئیسلامی دەدرێن. بۆیە وێڕای ئەوەی لەگەڵ ئازادیخوازانی ئێران و باقی نەتەوەکانی ئێران پێشوازی لەم هەوڵە دەکەین، سپاس و پێزانینی خۆشمان بۆ ئەم بەمشوورییە و کەمپەینی بەردەوام و دوو ساڵەی ڕێکخراوی "یەکگرتوویی دژی بەرگریکارانی حکوومەتی ئیسلامیی ئێران" و باقی چالاکان و ڕێکخراوە مافی مرۆییەکان دەردەبڕین. هیوادارین ئەم بڕیارە دەسپێکی وەرزێکی نوێی تێکۆشان لەپێناو کۆتاییهێنان بە سازان لەگەڵ کۆماری ئیسلامیی ئێران بێت.
حیزبی دێموکراتی وکردستانی ئێران
سکرتێری گشتی
مستەفا هیجری
٢٠ی گەلاوێژی ١٤٠٤ی هەتاوی
١١ی جوولای ٢٠٢٥ی زایینی
