ڕۆژی یەکشەممە، ٢٦ی گەلاوێژی ١٤٠٤(١٧ی ئاگۆستی ٢٠٢٥)، لەلایەن کۆمیتەی گشتیی حیزب لە وڵاتی بریتانیا، بەبۆنەی جێژنی ۲٥ی گەلاوێژ هەشتاهەمین ساڵوەگەڕی دامەزرانی حیزبی دێموکراتی کوردستانی ئێران، بە بەشداریی ئەندامان، لایەنگران، دۆستانی حیزبی دێموکراتی کوردستانی ئێران و جەماوەرێکی زۆر لە کوردانی دانیشتووی وەڵاتی بریتانیا جێژنێکی بەشکۆ لە شاری بێرمینگهام بەڕێوە چوو.
لە سەرەتای ڕێوڕەسمەكەدا هاوڕێیانی پێشكەشكار مینا سوارە و مەتین مەنسووری بە خوێندنەوەی شێعر وێڕای بەخێرهاتنی ئامادەبووان دەسپێكی ڕێوڕەسمەکەیان ڕاگەیاند.
ڕێورەسمەکە بە سروودی نەتەوایەتیی ئەی ڕەقیب و ڕاگرتنی چەند ساتێک بێدەنگی بۆ ڕێزگرتن لە شەهیدانی هەشتا ساڵ خەبات و شەهیدانی تازەی ڕۆژهەڵات (شەهیدانی ژینگە) دەستی پێ کرد.
پەیامی کۆمیتەی گشتیی حیزب لە بریتانیا بەبۆنەی ۲٥ی گەلاوێژ لەلایەن کاک فەرید دێهیم بەرپرسی پێوەندییە ئێرانی و كوردستانییەکانی كۆمیتەی حیزبەوە پێشکەش کرا.
لە بڕگەیەکی تری ڕێوڕەسمەکەدا پۆلێک لە ئەندامانی تەشکیلاتی ناوخۆ کە لە ماوەی ساڵانی ڕابردوودا هاتبوونە ناو ڕیزی تێکۆشانی تەشکیلاتی ئاشکرای حیزبەوە ڕێزیان لێ گیرا.
لەلایان هاوڕێ سۆران شەمسی بەرپرسی ڕاگەیاندنی حیزب لە وڵاتی بریتانیا، لەوحی ڕێز و پێزان پێشکەشی ئەندامانی تیمی ڕاگەیاندنی حیزب کرا.
هەیئەتی نوێنەرایەتیی چەندین حیرب و ڕێکخراوی کوردستانی و ئێرانی بەشدارییان لە جێژنی ۲٥ی گەلاوێژ یادی هەشتا ساڵەی دامەزرانی حیزب کرد کە بریتی بوون لە :
عەبدوڵا دەمیار، نوێنەری حیزبی خەڵکی بەلووچستان
جەمشید ئەمیری، سکرتێری گشتی بەرەی حیزبی بەلووچستان
پارتی دێموكراتی كوردستان
ڕێوڕەسمەکە بە گۆرانیی هونەرمەندان ئەیووب عەلی و ئارمان ساعیدپەنا بە هەڵپەرکێ و ڕەشبەڵەکی بەشداربوواندا کۆتایی پێ هات.
