ڕۆژی شەممە ڕێکەوتی یەکی خەرمانان، پارتی لیستی یەکگرتوو "ئینهێدس لیستن" سێمینارێکی بۆ بەڕێز "سۆرەن ئۆستەگۆ" ئەندام پارلەمانی ئەو حیزبە، لە شاری هۆرسێنس پێک هێنا کە نێوەڕۆکەکەی لە سەر ڕۆژهەڵاتی نێوەڕاست و داهاتووی کورد لە ناوچەکەدا بوو.
شاندی پێوەندییەکانی حیزبی دێموکراتی کوردستانی ئێران پێکهاتوو لە هەژار دەشتی، بەرپرسی پێوەندییەکان و دانا ئەلیاسی، ئەندامی کۆمیتەی پێوەندییەکانی حیزب لە دانمارک، بەشداریی ئەو سێمینارە بوون و لەلایەن ئۆستەگۆ و ئەندامانی ئەو پارتە پێشوازیی گەرمیان لێ کرا.
سۆرەن ئۆستەگۆ باسێکی تێر و تەسەلی لە سەر ڕۆژهەڵاتی نێوەڕاست و کوردستان پێشکەش کرد و ڕۆڵی کوردی لە شەڕی دژی تێرۆر و هەروەها تێکۆشان بۆ دێموکراسی و مافە نەتەوەییەکانیان بەرز نرخاند.
ناوبراو باسی لە هەوڵە تێکدەرەکانی ڕێژێمی ئێران لە ناوچەکەدا کرد و هەروەها پەرژایە سەر گرینگییەکانی پشتگیریکردن لە ئۆپۆزیسیۆنی دێموکرات بەتایبەتی کورد، لە دژی ڕژێمی تاران.
لە دوای سێمینارەکە، شاندی حیزبی دێموکرات لەگەڵ ئەم ئەندام پارلەمانەی وڵاتی دانمارک کۆ بوونەوە و لەم کۆبوونەوەیەدا جەخت لە سەر کارو پرۆژەی هاوبەش کرا.
هەر لەم کۆبوونەوەیەدا بڕیار درا کە لە ماوەیەکی نزیکدا کۆبوونەوەیەکی دیکە لە پارلەمانی دانمارک بۆ تاوتوێکردنی چالاکییە هاوبەشەکان بەڕێوە بچێت.
