ڕۆژی یەکشەممە ٨ی خەرمانانی ١٤٠٤، کۆمیتەی حیزبی دێموکرات لە شاری سیدنی لە وڵاتی ئوستارلیا، سێمینارێکی گشتیی بەبۆنەی یادی ٨٠ ساڵەی دامەزرانی حیزبی دێموکراتی کوردستانی ئێران بۆ بەڕێز کاک خالید عەزیزی وتەبێژی حیزب پێک هێنا .
لە سەرەتای سێمینارەکەدا بەڕێز کاک سمایل ئەنجیری بەرپرسی کۆمیتەی حیزب لە سیدنی بەخێرهاتنی میوانەکان و نوێنەرانی حیزب و لایەنە سیاسییەکانی کرد.
سێمینارەکە بە سروودی نەتەوایەتیی ئەی ڕەقیب و ڕاگرتنی چەند ساتێک بێدەنگی بۆ ڕێزگرتن لە شەهیدانی کوردستان دەستی پێ کرد.
کاک خالید عەزیزی لە سێمینارەکەدا باسی لە مێژووی حیزب و هەوراز و نشێوەکانی ٨٠ ساڵ لە تەمەنی حیزبی دێموکرات کرد.
کاک خالید ئاماژەی بەوە کرد کە ئەو نەسڵەی کە لە دژوارترین کات و هەلومەرجەکاندا ئەو حیزبەیان گەیاندە ئێرە و لە ماوەی ٨٠ ساڵ تەحەمولی سەختییەکانیان کرد نەسڵی ڕۆژهەڵاتی کوردستان بوون کە لە هەموو ڕۆژە خۆش و ناخۆشەکاندا لە گەڵمان بوون.
لە ڕۆژە خۆشەکاندا وەک و ئێمە خۆشحاڵ بوون و لە ڕۆژە ناخۆشەکانیشدا شانیان وەبەر سەختییەکان دەدا. کەم حیزب هەیە لە کوردستاندا و لە جووڵانەوەی گەلی کورددا کە بە ئەندازەی حیزبی دێموکرات قوربانیی دابێت و قوربانیی دەستی تێرۆریزم بێت.
بەڕێز عەزیزی وتی: قازی محەممەد ٨٠ ساڵ لەمەو بەر لە کۆمەڵگەیەکی نەخوێندەوار، کۆمەڵگەیەک کە تێکەڵاویی لەگەڵ دەرەوەی دونیا نەبوو و کۆمەڵگەیەک کە ئەزموونی حیزبی سیاسیی نەبوو، شانی وەبەردا و یەکەم حیزبی مودێڕنی کوردیی دروست کرد؛ بە بڕوای من ئەوە هەنگاوێکی گەورە و گرینگ بوو لەلایەن قازی محەممەدەوە.
هەر یازدە مانگ دوای ئەوە کۆماری کوردستانی دامەزراند و هەر ئەو حیزبە لە درێژەی کاری خۆیدا میعمارێکی لێهاتووی وەک دوکتور قاسملووی بۆ ئەو حیزبە دروست کرد کە توانیی حیزب وەسەریەک بخاتەوە، پەیڕەو پرۆگرامی بۆ دروست کرد، کە ئەویش گیانی خۆی فیدای ئەو حیزبە کرد. لە دواتریشدا ڕێبەرێکی وەک دوکتور سادق شەرەفکەندی لە درێژەی کاری نەمر دوکتور قاسملوودا و لە بەرامبەر کۆماری ئیسلامیدا لە هەوڵی کۆکردنەوەی ئێرانییەکان بە دژی کۆماری ئیسلامی بوو کە لە میکۆنۆس شەهید کرا.
وتەبێژی حیزب لە بەشێکی دیکەی وتارەکەیدا ئاماژەی بەوە کرد کە حیزبی دێموکرات لە ٨٠ ساڵ تەمەنی خۆیدا کەموکۆڕی و گرفتی هەبووە بەڵام هەمیشە هەوڵی یەکگرتنی لەگەڵ هەموو حیزبەکانی تری کوردستان داوە و پێداگریی لەوە کردووەتەوە کە هێزەکانی کورد لە ڕۆژهەڵات پێویستیان بە یەکگرتوویی هەیە .
لە پێوەندی لەگەڵ بەشەکانی تری کوردستاندا باسی ئەوەی کرد کە حیزبی دێموکرات بە ڕابردوویەکی ٨٠ ساڵە و بە ئیفتخاراتی ناوی پێشمەرگە، ئاڵاو و سروودی نەتەوایەتی هەوڵمان نەداوە دەستتێوەردان لە بەشەکانی تری کوردستاندا بکەین و لقوپۆ بۆ خۆمان دروست بکەین چون چارەنووس و داهاتووی هەر یەک لە بەشەکانی کوردستان پێوەندیی بە خەڵکی ئەو بەشەوە هەیە، تەداخولکردن لە کاروباری یەکتردا شتێکی باشە نییە با لێیگەڕێن هەر بەشەی کوردستان بۆخۆی بە دوای چارەسەری کێشەکانی خۆیدا بگەڕێت.
بەڕێز عەزیزی لە پێوەندی لەگەڵ نەتەوەکانی ناو ئێراندا باسی ئەوەی کرد کە گەلانی ئێران پێویستیان بە دۆستایەتی و برایەتی هەیەو هەروەها لە پێوەندی لەگەڵ تورک و کورد لە ورمێ دا دەبێت کورد و تورک لە پەنا یەکتر ژیانی دۆستانە بەرنە سەر و نابێ بهێڵن لە نێوانیاندا کێشە و ئاڵۆزی دروست بێت و لە ڕابردوو دەرس وەرگرن.
لە بەشی کۆتایی سێمینارەکەدا بەشداربووان پرسیاری خۆیان ئاراستەی بەڕێز عەزیزی کرد و وڵامی خۆیان وەرگرتەوە.
نوێنەری چەند لایەنی سیاسی بەشداری سێمینارەکە بوون بریتی بوون لە:
پژاک
پارتی دێموکراتی کوردستان
یەکیەتیی نیشتمانی کوردستان
کۆمەڵەی زەحمەتکێشان
کۆمەڵەی کوردی ئوسترالیا
ئەنجومەنی دێموکراسی کورد و چەندین کەسایەتیی تری کورد لە ئوسترالیا
لە کۆتاییدا چەند چەپکەگوڵ پێشکەش بە کاک خالید عەزیزی کرا.
