ڕۆژی پێنج شەممە، ٩ی گەلاوێژی ١٤٠٤ (٣١ی جوولای ٢٠٢٥)، ڕزگار ئالانی نوێنەری حیزب لە بریتانیا لە هۆڵی لیبراڵ ئینترناسیۆناڵ دیدار و چاوپێکەوتنێکی لەگەل بەڕێز ڤیل بێنیون بەرپرسی پەیوەندییە نێونەتەوەییەکانی حیزبی لیبراڵ دێموکراتی بریتانیا، پێک هێنا.
لە چاوپێکەوتنەدا دوایین ئاڵوگۆڕەکانی ئێران و بە تایبەتی ڕۆژهەڵاتی کوردستان لە دوای شەڕی ١٢ ڕۆژە باس کران.
هەر لەم پێوەندییەدا سەبارەت بە دۆخی ڕۆژهەڵاتی كوردستان و باقی نەتەوەکانی دیکەی ئێران قسە کرا و پەرژانە سەر دۆخی بژیوی خەڵک لە ناوخۆی ئێران .
نوێنەری حیزب لەو دانیشتنەدا باسی ئەوەی كرد کە کاتی ئەوە هاتووە کە کۆمەڵگەی نێونەتەوەیی پشتیوان و یارمەتیدەری خەڵکی ئازادیخوازی ئێران و ئوپۆزسیۆنی دێموكراتی ئەو وڵاتە بێت بو ئەوەی بە سەر ڕێژیمدا زاڵ بن و كۆتایی بە دیكتاتۆری بهێنن.
