ڕۆژی شەممە ٢٤ی خەزەڵوەر ١٤٠٤(١٥/١١/٢٠٢٥) دوای چەندین کۆبوونەوە و گفتوگۆی ئۆنلاین، "کۆمیتەی هاوکاریی نێوان لایەنە سیاسییەکانی هەموو پارچەکانی کوردستان" لە وڵاتی فەرانسە دامەزرا.
ئەم کۆمیتەیە لەلایەن ٩ حیزب و ڕێکخراوی سیاسیی کوردییەوە دامەزراوە کە هەر یەک خاوەنی ئەزموونی خەبات و مێژوویەکی درێژ لە خەبات و تێکۆشان لەپێناو پارێزگاری لە بەرژەوەندییە نەتەوەییەکانی هەموو کوردستانن.
ئەردەڵان عەبدوڵڵاهی نوێنەری پەیوەندییە کوردستانی و ئێرانییەکانی حیزب لەمبارەوە ڕاگەیاند: کۆمیتەکە دەبێتە چوارچێوەیەکی یەکگرتوو بۆ پاراستن و پارێزگاری لە بەرژەوەندییەکانی کورد لە هەموو پارچەکان، پەرەپێدانی کار و چالاکی سیاسی ـ دێموکراسی، پتەوکردنی پەیوەندیی نێوان ڕێکخراوە کوردییەکان، دروستکردنی پەیوەندی دۆستانە لەگەڵ حیزب و دەزگا و دامەزراوەکانی کورد لە فەرانسە و ئاگادارکردنەوەی بیروڕای گشتیی فەرانسە لەبارەی دۆخ و ڕووداوە گرنگەکانی کوردستان.
لایەنەکانی بەشدار بۆ پێکهێنانی هاوکارییەکی جیددیتر لە نیوان هێزە سیاسییەکان، هاوبەشکردن لە خزمەت بە کوردانی هەر چوار پارچە و ڕاکێشانی پشتیوانی کۆمەڵە مرۆڤ‌دوستانەکان و بیروڕای گشتیی فەرانسە بۆ پشتگیری خەبات دژی ڕێژیمە داگیرکەر و دیکتاتۆرەکان لە کوردستان خۆیان بە ئەركدار دەزانن.
کارە سەرەکییەکانی کۆمیتە پێک هاتووە لە: دانانی مێکانیزمی کۆبوونەوەی بەردەوامی لایەنەکان، پەیوەندیی سیستماتیک لە نێوان ئەندامان، هەڵوێستگرتن لەبارەی ڕووداو و پێشهاتەکان، بڵاوکردنەوەی ڕاگەیاندن و بەڕێوەبردنی کۆبوونەوە، سێمینار و ڕێوڕەسمەکانی وەک نەورۆز و ٢ی ڕێبەندان.
دوای کۆبوونەوەکە، یەکەم هەنگاو سەردانی نوێنەرایەتیی هەرێمی کوردستان لە پاریس بوو. لەو دیدارەدا باس لە چالاکییەکانی کۆمیتەکە و چەندین بابەتی گرینگ بۆ ڕاپەراندنی ئەرک و کارەکان کرا.
بڕیار درا کە لە داهاتووی نزیکیدا سەردانی ئەنستیتۆی کوردی و دامەزراوە چالاکەکانی تر لە فەرانسە بکرێ و پەیوەندییەکان درێژ پێ بدرێت.
لایەنەکانی ئەم کۆمیتەیە بریتین لە:
حیزبی دێموکراتی کوردستانی ئێران
پارتی دێموکراتی کوردستانی باشوور
حیزبی شیوعی کوردستان
کۆمەڵەی زەحمەتکێشانی کوردستان
پارتی سۆسیالیستی کوردستان PSK
پارتی ماف و ئازادی HAK-PAR
حیزبی وڵاتپارێزی کوردستان
پارتی یەکیەتیی دێموکراتی کورد لە سووریە
پارتی دێموکراتی پێشڤەڕۆی کورد لە سووریە
