وەفدێکی یەکیەتیی ژنانی دێموکراتی کوردستانی ئێران پێکهاتوو لە بەڕێزان کەژاڵ نەقشبەندی بەرپرسی یەکیەتیی ژنان لە دەرەوەی وڵات و بەرپرسی شاندەکە، ڕۆژە عەزیزی نوێنەری یەکیەتیی ژنان لە کۆنگرەی ژنانی ئینتەرناسیۆناڵ سۆسیالیست، و نەمام زەڕینفام بەرپرسی ڕاگەیاندنی یەکیەتیی ژنان لە دەرەوەی وڵات، بەشدارییان لە کۆبوونەوەی ساڵانەی ژنانی ئینتەرناسیۆناڵ سۆسیالیستدا کرد.
لەم کۆنگرەدا وتاری یەکیەتیی ژنانی دێموکراتی کوردستانی ئێران لەلایەن هاوڕێ ڕۆژە عەزیزی بە زمانی ئینگلیزی خوێنرایەوە.
بەڕێزیان لە وتارەکەیدا تیشکی خستە سەر بارودۆخی کچان و ژنانی ئێران و بەتایبەت کوردستان لە ئەمڕۆی دەسەڵاتی پڕ زەبروزەنگی ئێراندا کە بەهیچ جۆرێ ژنانی کورد پاشگەز نابن لەو خەباتە چەندڕەهەندییەی کە لە درێژایی مێژوودا لە ئەستۆیان گرتووە.
خاتوو ڕۆژە عەزیزی بە سەرنجدان بەوەی کە لەمڕۆی ئێراندا داتا و زانیاری وەرگرتنی دروست ئەستەمە، وتی: "ڕێژیمی ئێران له هەموو کاتێک زیاتر هەنگاوی ناوە بۆ پێشێلکردنی مافەکانی مرۆڤ و لەو بوارەوە گەیشتووەتە ئاستێکی مەترسیدار، و ژنانی کورد و ژنانی نەتەوەکانی تری دانیشتووی ئەم جوگرافیایه، وەک ژنانی نەتەوەی بەلووچ له دادگای ڕواڵەتی و نامرۆڤانە، دەخاته بەر تۆمەتی درۆ و هیچ ڕێکخراوێکی ناحکوومی و سەربەخۆ ناتوانن بە هۆکاری ئەمنی ئەم پێشێلکاری و تاوانانە لە ئێراندا بەڵگەمەند و تۆمار بکەن.
کۆبوونەوەی ساڵانەی ژنانی ئینتەرناسیۆناڵ سۆسیالیست ڕۆژی ٦ی سەرماوەزی ١٤٠٤ (٢٧/١١/٢٠٢٥) بە میوانداریی حیزبی کرێکاری ماڵتا دەستی پێ کرد و ئێوارەی ٧ی سەرماوەزی ١٤٠٤ (٢٨/١١/٢٠٢٥)، لە شاری ڤالێتا-ی وڵاتی ماڵتا کۆتایی بە ئەرکەکانی خۆی هێنا.
