ڕۆژی پێنجشەممە ٦ی سەرماوەزی ١٤٩٤ (٢٧/١١/٢٠٢٥)، خاتوو "ڕێناس خزری" بەرپرسی پەیوەندییە نێونەتەوەییەکانی حیزبی دێموکراتی کوردستانی ئێران لە سوید، دیدارێکی لەگەڵ سێرکان کۆسە ئەندامی پارلەمانی سوید و "ڕیکس داگێن" لە حیزبی سۆسیال دێموکراتەکان و ئەندامی " IPU"، یەکیەتیی نێونەتەوەیی پارلەمانەکان، پێک هێنا.
یەکیەتیی نێونەتەوەیی پارلەمانەکان لە ئەندامانی پێنج حیزبی پارلەمان لە سوید پێک هاتووە و لە ئاستی جیهانیدا کار بۆ ئاشتی و هاوکاریی وڵاتان دەکات و سەرجەم ١٨٠ وڵات تێیدا ئەندامن.
لە سەرەتای کۆبوونەوەکەدا ڕێناس خزری باسێکی لەسەر بارودۆخی ڕۆژهەڵاتی کوردستان پێشکەش کرد و تیشکی خستە سەر دوایین ڕووداوەکانی ناوچەکە. لەو باسەدا پەردە لەسەر زەبر و زەنگی نامرۆڤانەی کۆماری ئیسلامیی ئێران دژ بە هەر دەنگێکی ئازادیخواز و بە تایبەت ئازادیخوازانی کوردستان لادرا.
ڕێژەی ئیعدامەکان و زیندانییان خرایە بەرچاوی بەڕێز سێرکان کۆسە. باس لەوە کرا کە ڕێژیم ڕۆژ بە ڕۆژ پەرە بە سەرکوت دەدات و بە ناشیاوترین شێوە و بە بیانووی جۆراوجۆر سەدان و هەزاران کەس دەسبەسەر کردووە و دوور لە هەر پێداچوونەوەیەکی یاسایی حوکمیان بەسەردا دەسەپێنێ.
ناوبراو ئاماژی بە خەباتی لاوان و ژنان کرد کە هەر لە پەرەسەندندایە و سەرەڕای ئەوەی کە ڕێژیم بە بیانووی نادیار و دوور لە مەنتق و یاسا، سزایان دەدات، لە خەباتی خۆیان بۆ ئازادی، سڵ ناکەنەوە.
بەشی دووەمی دیدارەکەدا بەڕێز سێرکان بڕیاری دا کە پێشنیار و داواکارییەکان بباتەوە بۆ هاوکارانی و لە دانیشتنەکانی داهاتوودا هەوڵ بدرێ کە بۆ پرۆژەی هاوبەش هەنگاو هەڵگیرێ.
بەڕێزیان ئاماژەی بەوە دا کە پەیوەندیی بەردەوام گرینگە بۆ ئەوەی ئەو و هاوکارانی بتوانن بە شێوەیەکی باش ببنە دەنگی ئازادیخوازانی کوردستان بە تایبەتی و ئازادیخوازانی ئێران بە گشتی، بە گشت چین و توێژەکانەوە.
لە کۆتاییی دیدارەکەدا ڕاپۆرتێک کە کۆکراوەی چەند ڕاپۆرتی پێشێلکردنی مافی مرۆڤ لە ئێراندا بوو، پێشکەش بە بەڕێز سێرکان کرا.
ڕاپۆرتەکان زۆر بە ڕاشکاوی ئەوە نیشان دەدەن کە ڕێژەی تاوانە نامرۆڤییەکان لە کوردستان بە بەراورد لەگەڵ ناوچەکانی دیکەی ئێران زیاتر و بەربڵاوترە کە ئەوەش جێگەی سەرنجی بەڕێزیان بوو.
