ڕۆژی هەینی ٧ی سەرماوەزی ١٤٠٤ بەڕێز هەژیر قادری بەرپرسی ڕێکخراوی کۆمەڵەی مافی مرۆڤی کوردستان بۆ گەشەپێدان لەگەڵ شاندی یاوەری لەسەر ڕەوشی کورد و نەتەوەکانی ژێر ستەم لە ئێران، دەستێوەردانی ئێران لە هەرێمی کوردستان لە ڕێگەی میلیشیا شیعەکان و هەروەها ڕەوشی کورد لە ڕۆژاوای کوردستان و سەرکوتی خەڵکی کوردستان و ڕۆڵی کورد، لە هەژدەیەمین کۆڕبەندی نەتەوە یەکگرتووەکان لەسەر پرسی نەتەوەکان و کەمایەتییەکان وتارێکی پێشکەش کرد.
لە ڕۆژی دووەمی کۆڕبەندەکەدا هاوڕێیان هەژیر قادری و ئیدریس ئەلیاسی لەلایەن ڕێکخراوی کۆمەڵەی مافی مرۆڤی کوردستان بۆ گەشەپێدان هەروەها خاتوو شنە ڕەزابی لەلایەن کۆمەڵەی مافی مرۆڤی کوردستان ـ ژنێڤ بە شێوەیەکی کارا بەشداری کۆبوونەوەکان بوون و وتاریان پێشکەش کرد و لە ماوەی ئەو دوو ڕۆژەدا، چەندین دیدار و چاوپێکیەوتنیان لەگەڵ بەرپرسانی نەتەوە یەکگرتووەکان، ڕيکخراوەکان و هەروەها نوێنەرانی وڵاتەکان پێک هێنا.
هەژیر قادری لە پێشکەشکردنی پەیامێکدا، تیشکی خستە سەر تاوانەکانی ڕێژیمی ئێران دژ بە گەلانی ئازادیخوازی ئێران بە گشتی و نەتەوەکانی ئێران لە نێوانیاندا کورد، بەلووچ، ئازەری و عەرەب و لە تەوەرێکی دیکەدا، باسی گوشارە هەرێمییەکانی ئەم دواییانەی سەر هەرێمی کوردستانی کرد.
ناوبراو، لە کۆتایی قسەکانیدا، ئاماژەی بە پێشێلکارییەکانی دژ بە هەر دوو نەتەوەی کورد و دروز لەلایەن حکوومەتی ناوەندیی سووریەوە کرد کە لە پاش نووسینەوەی دەستووری نوێی کاتی سووریە هیچ ئاماژەیەک بە هەر دوو نەتەوەکە نەکراوە و لە مافە سەرەتاییەکانیان بێبەش کراون.
لە کۆتایی پەیامەکەدا، کۆمەڵگای مافی مرۆڤ لە کوردستان بۆ گەشەپێدان، داوای لە کۆمەڵگەی نێودەوڵەتی کرد کە بۆ پاراستنی کەمینەکان لە ناوچەکەداو هەنگاوی جیددی بنێت و پێش بە سەرکوتەکانی ڕێژیمی ئێران بگرێت.
