ڕۆژی شەممە ٨ی سەرماوەزی ١٤٠٤ (٢٩/١١/٢٠٢٥)، لە شاری کۆپێنهاگ پێتەختی وڵاتی دانمارک سێمینارێک بۆ بەڕێز "مستەفا ئۆزچەلیک" سەرۆکی گشتیی پارتیا وڵاتپارێزێن کوردستانێ ـ PWK پێک هات.
لەسەر بانگهێشتی فەرمیی پارتی ناوبراو لەم وڵاتە هەیئەتێکی کۆمیتەی حیزبی دێموکراتی کوردستانی ئێران پێکهاتوو لە "ئەحمەد ڕەحمانی" بەرپرسی بەشی پەیوەندییە ئێرانی و کوردستانییەکانی کۆمیتەی حیزب لە وڵاتی دانمارک بە هاوڕێیەتی بەڕێز "مەسعود نادری" بەرپرسی کۆمیتە ناوچەی شیلەندی حیزب لەم دوورگەیە بەشداری ئەم سێمینارە بوون.
بەڕێز مستەفا ئۆزچەلیک لەم سێمینارەدا ئەم تەوەرانەی هێنایە بەر باس.
ناوبراو باسێکی گشتیی لەسەر هەلومەرجی هەر چوارپارچەی کوردستان، هەڵسەنگاندنێکی بارودۆخی ئێستای ناوچەکە، تاوتوێکردنی پرۆسەی ئاشتی لە باکووری کوردستان، ڕۆژهەڵاتی ناوەڕاست و ئەو ئاڵوگۆڕانەی کە بەسەر ناوچەکەدا هاتوون و زیاتر دەرفەتی بۆ گەلی کورد خولقاندووە کرد کە چۆن خۆی لەگەڵ ئەم ئاڵوگۆڕانەدا بگونجێنێ و لە فەرفەتەکان کەڵکی پێویست وەربگرێ، لەیەکتر نزیکبوونەوەی هەستی نەتەوەیی، وێژمان و دیالۆگ. بەڕێزیان ڕوانگەی پارتیا وڵاتپارێزانی کوردستانی لەم بوارانەدا هێنایە بەرباس و شڕۆڤەیەکی باشی ئەم بابەتانەی کرد کە بوو بەهۆی ڕەزامەندی بەشدارانی سێمینارەکە.
ئەوەی جێی ئاماژەپێکردنە هەیئەتی بەشداری حیزب لەم سێمینارەدا لەسەر قسە و بابەتەکانی بەڕێز مستەفا ئۆزچەلیک ڕوانگەی حیزبی دێموکراتی کوردستانی ئێرانیان هێنایە بەر باس؛ بە تایبەتی ئەو بەشەی کە پەیوەندیی بە هاوکاری و لێکنزیکبوونەوەی هێزەکانی ڕۆژهەڵاتی کوردستان لە ناوەندی دیالۆگ کە لە ئێستادا ٧ هێز و لایەنی سیاسی لەم ناوەندەدا بەشدارن، هەروەها بەشێکی دیکەی باسەکانی هەیئەتی حیزب لەم سێمینارەدا پەیوەندیی بە تەریکخستنەوەی کۆماری ئیسلامیی ئێران لە بازنەی ناو دەوڵەتیدا و ئاماژەکردن بە ناساندنی سپای پاسداران وەکو سپۆنسەری تێرۆریزمی نێودەوڵەتی لەلایەن وڵاتی ئوسترالیاوە.
جێی ئاماژەپێکردنە ژمارەیەکی بەرچاو لە نوێنەرایەتی هێز و لایەنە سیاسییەکانی هەر چوارپارچەی کوردستان، کەسایەتی و نوێنەری کۆمەڵە کوردییەکان لە وڵاتی دانمارک بەشداری ئەم سێمینارە بوون.
