ڕۆژنامەی "ئۆرشەلیم پۆست" لە ڕاپۆرتێکی نوێدا سەبارەت بە گۆڕانی شێوازەکانی سەرکوتکردن لە ئێران ڕایگەیاند کە لە دوای شەڕی ١٢ ڕۆژە، کۆماری ئیسلامی لە ڕووبەڕووبوونەوەی ئاشکرای شەقامەکانەوە بەرەو میتۆدی شاراوەتر و سیستماتیکتر ڕۆیشتووە.
بەپێی ئەم ڕاپۆرتە، ڕێژیم بە شێوازی ڕاستەوخۆ ڕووبەڕووبوونەوەی نەبووە بەڵكوو ئێستا زیاتر پشت بە دۆزینەوەی کەیس و چاودێریی دیجیتاڵی و سزا و سنووردارکردنی کۆمەڵایەتی لە دژی هاووڵاتییان دەبەستێت، ڕەوتێک کە سەرکوتکردنەکەی بێدەنگتر بەڵام قووڵتر کردووە.
ڕۆژنامەی ئۆرشەلیم پۆست نوسیوویەتی، هەرچەندە دۆخی دەرەوەی شارەکان ئارام دەردەکەوێت، بەڵام ناڕازیبوونی کۆمەڵایەتی و گوشارە ئەمنییەکان چینە جیاوازەکانی خەڵکی گرتووەتەوە.
نموونەگەلێکی وەک گردبوونەوەی لاوان یان نمایشی مۆسیقای سەر شەقامەکان بە ڕواڵەت بەبێ دەستێوەردانی هێزە ئەمنییەکان بەڕێوە دەچن، بەڵام دواتر ڕێژیم هەمان وێنە بۆ دەستنیشانکردن و گوشارخستنە سەر بەشداربووان بەکار دەهێنێت.
لەم ڕاپۆرتەدا ئاماژە بە زیادبوونی بەرچاوی ئێعدامەکان لە دوای شەڕی ١٢ ڕۆژە کراوە و ئەوە بە بەشێک لە سیاسەتی تۆقاندنی ڕێژیم وەسف کراوە.
هەر لە هەمان کاتدا ڕێژیمی تاران هەوڵ دەدات وێنەیەکی جیاواز لە بارودۆخی ناوخۆ بخاتە ڕوو؛ هەر لە بڵاوکردنەوەی گرتە ڤیدیۆییەکان سەبارەت بە جێژنە ئایینییەکانی کەمینەکانەوە بگرە تا دەگاتە بانگهێشتکردنی کەسایەتییە میدیاییە بیانییەکان بۆ دروستکردنی گێڕانەوەیەک کە ئێران تاکوو وەک کۆمەڵگایەکی لێبوردە پیشانی بدات.
ڕۆژنامەکە لە کۆتاییدا ڕایگەیاندووە کە شەڕەکە سروشتی حوکمڕانیی لە ئێراندا نەگۆڕیوە و زۆرێک لە شرۆڤەکاران پێیان وایە کۆمەڵگە چاوەڕێی ئەو ساتە دەکات کە گوشارە ناوخۆییەکان و دووبەرەکییەکان دەگەنە خاڵێکی چارەنووسساز؛ ساتەوەختێک کە دەتوانێت کاریگەریی لەسەر داهاتووی سیاسی ئێران هەبێت.
