ڕۆژی پێنجشەممە ٨ی خەزەڵوەری ١٤٠٤(٣٠ی ئۆکتۆبری ٢٠٢٥) لە شاری ئێڤر لە وڵاتی بێلژیک لەلایەن کۆمیتەی حیزبی دێموکراتی کوردستانی ئێرانەوە ڕێوڕەسمێکی بەشکۆ بۆ ئەسپەردەکردنی تەرمی تێکۆشەری دێرین و ماندوونەناسی حیزبەکەمان خاتوو حەلیم قادری بەڕێوە چوو .
بەداخەوە خاتوو حەلیم قادری بە هۆی نەخۆشیی شێرپەنجە ڕۆژی شەممە ٣ی خەزەڵوەری ١٤٠٤(٢٥ی ئۆکتۆبر) دوای ماوەیەکی زۆر بەربەرەکانێ لەگەڵ نەخۆشییەکە ماڵاوایی لە هاوڕێیان و هاوسەنگەرانی کرد.
خاتوو حەلیم کچی مام قادر قادری و پوورە شەم لە ساڵی ١٩٧٩ـی زایینی لە بنەماڵەیەکی تێکۆشەر و کوردپەروەری خەڵکی پیرانشار لە شاری قەڵادزێ لەدایک بوو.
تاکوو قۆناغی فاکەڵتی پەروەردە/بەشی کۆمەڵایەتی بۆ ماوەی یەک ساڵ درێژەی بە خوێندن دا و لە ساڵی ٢٠٠٥ ژیانی هاوبەشی لەگەڵ کاک دارا ناتق پێک هێنا.
شایانی باسە جیا لە خاتوو حەلیم چوار خوشکی تری ژیانی هاوبەشیان لەگەڵ پێشمەرگەکانی حیزب پێک هێناوە و دڵسۆزی و خەمخۆریی ئەو بنەماڵە سەربەرزە بۆ حیزبەکەمان جێگای ڕێزو پێزانینە، دادە حەلیم خاوەنی برایەک بە ناوی حەسەن قادری بوو کە ئەویش لە سوید کوچی دوایی کرد.
خاتوو حەلیم چەندین ساڵ ئەندامی بەڕێوەبەریی کۆمیتەی زاگرۆس، ئەندامی بەڕێوەبەریی یەکیەتیی ژنان، ئەندامی بەڕێوەبەریی یەکیەتیی لاوان و ئەندامی بەڕێوەبەریی کۆمیتەی حیزب لە وڵاتی بێلژیک بووە و هەتا کاتی ماڵاوایی لە ژیان، بەوپەری دڵسۆزییەوە لە خزمەت بە حیزبەکەی بەردەوام بوو.
خاتوو حەلیم ژنێکی میهرەبان و لەسەرەخۆ و دڵسۆز و جێگای باوەڕ بوو. لە کاری حیزبیدا جیددی و بە پەرۆشەوە کارەکانی ئەنجام دەدا.
ناوبراو ساڵی ٢٠٢٢ کوردستانی بەجێ هێشت و لە وڵاتی بێلژیک گیرسایەوە. لەوێش هەر وەک کوردستان دەستی بە کار و تێکۆشانی حیزبی کردەوە و لەوپەڕی دڵسۆزیدا کارەکانی ئەنجام دەدا و جیا لە ئەندامی کۆمیتەی حیزب، ئەندامی کۆمیتەی ژنانیش لە بێلژیک بوو.
