ئێوارەی ڕۆژی هەینی ٢١ی سەرماوەزی ١٤٠٤ (١٢/١٢/٢٠٢٥)، بە مەبەستی ڕێزلێنان لە ۲٦ی سەرماوەز ڕۆژی پێشمەرگە و ئاڵای کوردستان، کۆمیتەی حیزب لە شاری کالمار بە هاوکاریی کۆمیتەی یەکیەتیی کوردان لەو شارە، ڕێوڕەسمێکی پڕشکۆیان بۆ ئەندامان و بنەماڵەکانی حیزب و کوردستانییانی ئەو شارە پێک هێنا.
ئەم ڕێوڕەسمە پاش بەخێرهاتنی میوانان لەلایەن خاتوو "ڕۆژین ئەشرەفی" ئەندامی کۆمیتەی ئامادەکاری ڕێوڕەسمەکەوە، بە سروودی نەتەوایەتیی ئەی ڕەقیب دەستی پێ کرد و خولەکێک بێدەنگی بۆ ڕێزلێنان لە گیانی پاکی شەهیدانی کورد و کوردستان ڕاگەیاندرا.
پەیامی کۆمیتەی گشتیی حیزب لە سوید لەلایەن هاوڕێ "جەلال بهرووز ئەلیاسی"ـیەوە خوێندرایەوە.
دواتر سروودی "من پێشمەرگەی کوردستانم" لەلایەن پۆلێک لە پێشمەرگە دێرینەکان و ئەندامانی حیزب لە شاری کالمار پێشکەش کرا.
لە ناوبڕێکدا کێبەرکێیەک لەلایەن "ساڵحی وەیسی" و "بابا ئەلیاسی"ـیەوە بەڕێوە چوو.
پاشان سروودی خوایە وەتەن ئاواکەی لەلایەن "جەلالی ئەلیاسی"یەوە لەگەڵ پۆلێک لە منداڵە چاوگەشەکانی دێموکرات پێشکەش کرا.
لاوانی دەست و پەنجە ڕەنگین "سەباح" و "پەیمان ئەلیاسی" بە موسیقا و گۆرانی کۆڕەکەیان ڕازاندەوە.
