ڕۆژی یەکشەممە، ٢٨ی بەفرانبار، ناوەندی ڕەوەندی کوردستان لە برۆکسێل، سێمینارێکی تایبەتی بەبۆنەی ٨٠ ساڵەی دامەزرانی کۆماری کوردستان، لە شاری برۆکسێل پێتەختی بێلژیک، بۆ هەرکام لە بەڕێزان "دارا ناتق" چالاکی سیاسی و "پەروەر ئامەد"، نووسەر و ڕووناکبیر، بە بەشداریی دەیان کەسایەتیی سیاسی و ئاکادێمیک بەڕێوە برد.
سەرەتای سێمینارەکە، بە سروودی نەتەوایەتیی "ئەی ڕەقیب" و ساتێک بێدەنگی بۆ ڕێزگرتن لە گیانی پاکی سەرجەم شەهیدانی ڕێگای ڕزگاریی کورد و کوردستان دەستی پێ کرد.
لە بڕگەی یەکەمی سێمینارەکەدا، کاک دارا ناتق، باسی لە مێژووی کورتی کۆماری کوردستان کرد و وتی: "هەرچەندە کۆماری کوردستان، ماوەی ٣٣٠ ڕۆژ بەردەوام بوو، بەڵام مێژووییەکی شکۆداری لە مێژووی هاوچەرخی جووڵانەوەی ڕزگاریخوازیی نیشتمانیی نەتەوەی کورددا تۆمار کردووە".
دواتر ناوبراو، ئاماژەی بە دەسکەوتە گرنگەکانی کۆماری کوردستان لەوانە: "بەدەستهێنانی ئازادی بۆ نەتەوەی کورد لەو بەشەی کوردستان، گەشانەوەی بواری ڕۆشنبیری لەو ناوچەیەی کوردستاندا، بەفەرمیکردنی زمانی کوردی، خوێندن لە خوێندنگەکانی ژێردەسەڵاتی کۆمار بە زمانی کوردی، هەروەها دەرکردنی چەندین بڵاوکراوەی سیاسی و ئەدەبی و کۆمەڵایەتی لەوانە: ڕۆژنامەی کوردستان، گۆڤاری هەڵاڵە و گڕوگاڵی منداڵانی کورد، و هاواری نیشتمان، گرنگیدان بە بواری ئابووریی کوردستان، هەوڵدان بۆ ساغکردنەوەی بەروبوومی توتنی کوردستان لە سۆڤییەت، سەقامگیری و پاراستنی هێمنی دانیشتووانی کوردستان بەتایبەت لە شارەکاندا، بەشداریی ژنان و لاوان بۆ نێو خەباتی سیاسی و خەباتی نەتەوەیی و دروستکردنی کۆمەڵە و ڕێکخراوی پیشەییی تایبەت بە خۆیان و دەیان دەسکەوتی گەورەی دیکە کرد.
دواتر، بەڕێز دارا ناتق، ئاماژەی بەوە دا، کە کۆمار لە هەنگاوی یەکەمدا لە سەر بنچینەی کوردستانیبوون دامەزرا و بۆ گەیشتن بە ئامانجەکانی باوەڕی بە دێموکراسی هەبوو. لە هەمان کاتدا لە نێو خۆیدا هەوڵی یەکڕیزیی نێو چین و توێژەکانی کۆمەڵگەی خۆی دەدا. کۆماری کوردستان پێشکەوتنخواز بوو و هەموو هەوڵێکی بۆ ئەوە بوو کوردستان لە قافڵەی پێشکەوتن دوا نەکەوێ و لە هەڵسوکەوت لەگەڵ خەڵکی خۆی و تەنانەت دوژمنانی خاوەنی گیانی لێبوردەیی بوو.
دواتر پەروەر ئامەد، ڕووناکبیر و نووسەری ناوداری کورد کە خەڵکی باکووری کوردستانە و پەرتووکێکی تایبەت بە ژیان و بەرسەرهاتی دوکتور سادق شەرەفکەندی بە زمانی تورکی نووسیوە، لەو سێمینارەدا باسێکی تێروتەسەلی لەسەر ژیانی دوکتور شەرەفکەندی هەر لە تەمەنی منداڵییەوە هەتا ڕۆڵ و پێگەی سیاسیی ناوبراو لە نێو بزووتنەوەی ڕزگاریخوازیی نەتەوەی کورد و حیزبی دێموکراتدا کرد.
بەڕێزیان، زۆر بە وردی باسی لە تایبەتمەندییەکانی د. شەرەفکەندی وەک ڕێبەرێکی مۆدێڕن و شۆرشگێر لە حیزبی دێمۆکرات و بەتایبەتی سەردەمی سکرتێری ناوبڕاو کرد. لایەنێکی تری باسەکەی ناوبراو ئاماژەدان بە تیرۆری ناجوامێرانەی ئەو ڕێبەرەی کورد و هاوڕێیانی بە دەستی ڕێژیمی کۆماری ئیسلامیی ئێران بوو.
