ڕۆژ شەممە، ٢٧ی بەفرانبار، کۆمیتەی گشتیی حیزبی دێموکراتی کوردستانی ئێران، بە هاوکاریی یەکیەتیی ژنان، یەکیەتیی لاوان و ئەنجومەنی زیندانییانی سیاسیی کوردستانی ئێران بۆ ڕێزگرتن لە ٢ی ڕێبەندان، یادی ٨٠ ساڵەی دامەزرانی کۆماری کوردستان، ڕێوڕەسمێکی بەشکۆیان لە "سۆڵنا هاڵڵێن" لە شاری ستۆکهۆڵم سوید بەڕێوە برد.
سەرەتای ڕێوڕەسمەکە بە سروودی نەتەوایەتیی "ئەی ڕەقیب" و ڕێزگرتن لە گیانی پاکی سەرجەم شەهیدانی ڕێگای ڕزگاریی کورد و کوردستان دەستی پێ کرد.
لە بڕگەی دواتردا کورتەفیلمێکی بەڵگەنامەیی سەبارەت بە مێژووی کورد و بزووتنەوە ئازادیخوازانە و دامەزرانی کۆماری کوردستان بە زمانی سویدی پێشان درا.
دواتر خاتوو "ماندانا کاکایی"، وێڕای بەخێرهێنانی میوانە سویدییەکان کورتەمێژووی دامەزرانی کۆماری کوردستانی بە زمانی سویدی خوێندەوە.
هەروەها هونەرمەندان نارین فەقێ و باوکی، چەند سروودێکی شۆڕشگێڕانەیان پێشکەش کرد.
لە بڕگەیەکی دیکەی ڕێوڕەسمەکەدا، بەڕێز کاک "خالید عەزیزی" وتەبێژی حیزبی دێموکراتی کوردستانی ئێران، وتارێکی پێشکەش کرد.
نێوەرۆکی وتەکانی کاک خالید ئاوڕدانەوەیەک بوو لە مێژووی دامەزرانی کۆماری کوردستان و ڕۆڵی پێشەوا قازی محەممەد لە دامەزرانی ئەو کۆمارەدا.
کاک خالید ئاماژەی بەوە دا، کە بەرحەقبوونی ئەو ڕێبازەی شەهید پێشەوا بنیاتی نا، هەتا ئێستاش زیاتر لە هەموو ڕێبازەکانی دیکە تەبایی لەگەڵ داواکارییەکانی گەلەکەماندا هەیە.
ناوبراو، هەروەها پەرژایە سەر ڕوونکڕدنەوەی دووبارەی سیاسەت و هەڵوێستەکانی حیزبی دێموکراتی کوردستانی ئێران لەپێوەندی لەگەڵ هێزە سەرانسەری و کوردستانییەکاندا.
شایانی باسە، پەیامی نوێنەرایەتیی حکوومەتی هەرێمی کوردستان لە سوید لەلایەن "نیشتیمان عەزیزی"، بەرپرسی پێوەندییە کوردستانییەکانی کۆمیتەی گشتیی سویدی حیزبی دێموکراتەوە خوێندرایەوە.
دواتر پەیامی یەکیەتییەکانی ژنان، زیندانیانی سیاسی و لاوانی دێموکراتی ڕۆژهەڵاتی کوردستان، لەلایەن "شلێر حەسەنپوور"، بەرپرسی کۆمیتەی سویدی یەکیەتیی ژنانی دێموکراتی کوردستانی ئێرانەوە پێشکەش کرا.
لە بڕگەی دواتردا، "فێردریک ماڵم"، ئەندامی پارلەمانی سوید، "ڕیکس داگ" لە حیزبی لیبڕاڵەکانی سوید و دۆستی لەمیژینەی کورد، وتارێکی کورتیان پێشکەش کرد.
ڕیکس داگ وەک هەموو جارێک، پشتیوانی بێ ئەملاوئەولای خۆی بۆ دۆزی ڕەوای کورد دووپات کردەوە و سەبارەت بە خۆپێشاندانەکانی ئەم دواییانەی ئێران، بەتایبەت ڕۆژهەڵاتی کوردستان و کوشتاری دڕندانەی خەڵک لەلایەن هێزەکانی کۆماری ئیسلامییەوە وەک بەڵگەی حاشاهەڵنەگر بۆ دڕندەیی و خەڵکینەبوونی ئەو ڕێژیمە خستە ڕوو و پشتیوانی لە ڕووخانی ئەو ڕێژیمە کرد و هیوای خواست ساڵی داهاتوو ٢ی ڕێبەندان لە ڕۆژهەڵاتی کوردستان جێژن بگرن.
هەروەها نوێنەری حیزبی سۆسیال دێموکڕاتەکانی سوید، "قادر کەسیرگا" لە وتارەکەیدا وێڕای هێنانە بەرباسی بارودۆخی کورد لە هەموو بەشەکانی کوردستان بەگشتی و ڕۆژاوا و ڕۆژهەڵاتی کوردستان بەتایبەتی لەم دواییانەدا، هیوای خواست نەتەوەی کورد بتوانێت ئەو ناخۆشی و نەهامەتییانە تێپەڕێنێت و بە ئازادی بگات.
پەیامی لاوانی حیزبی لیبڕاڵەکانی سوید، لەلایەن "ئانتۆن هۆڵملوند" پێشکەش کرا و ناوبراویش پشتیوانیی لاوانی حیزبەکەی بۆ داخوازییە ڕەواکانی گەلی کورد و بەتایبەت لاوانی ڕۆژهەڵاتی کوردستان کە بوونەتە سەنگەرێکی پتەوی بەگژداچوونەوەی کۆماری ئیسلامی و لەم دواییانەدا بە هەزاران کەسیان لەلایەن هێزە سەرکوتکەرەکانی کۆماری ئیسلامییەوە یان گیانیان لەدەست داوە و بریندار بوون یان دەسبەسەر و ئەشکەنجەکراون، دەربڕی.
هەروەها "ئەرکان کۆسێ"، کە خۆی کوردە و سەر بە حیزبی سۆسیال دێموکراتەکانی سویدە، چەند وتەیەکی کورتی بە زمانی کوردی لە بارەی دەسکەوتەکانی کۆماری کوردستانەوە پێشکەش کرد.
شایانی باسە، هەرکام لە حیزبەکانی کۆمیتەی هاوکاریی هێزە سیاسییەکانی کوردستان لە سوید، پارتی دێموکراتی کوردستان- لێژنەی ناوچەی سوید، کۆمەڵەی شۆڕشگێڕی زەحمەتکێشانی کوردستانی ئێران - کۆمیتەی سوید، کۆمەڵەی زەحمەتکێشانی کوردستان- کۆمیتەی سوید، ڕێکخراوی خەباتی کوردستانی ئێران، نوێنەرایەتیی کۆمەڵە لە دەرەوەی وڵات، فیدڕاسیۆنی کۆمەڵە کوردستانییەکان، پارتیا سۆسیالیستا کوردستان، دیا کورد، حێزبێ مەردۆمێ بەلووچستان (مردم بلوچستان)، پارتی دێموکراتی کورد لە سووریە، پارتی دێموکراتی پێشڕەوی کورد لە سووریە، پارتی دێموکراتی کوردستان-باکوور، پارتی وڵاتپارێزی کوردستان، ڕێکخراوی خەباتی شۆڕشگێڕی کوردستان، کۆنفیدراسیۆنی ڕەوەندی کوردی، ژنانی دیاسپۆڕای کوردستان لە سوید، کۆنگرەی نەتەوەکانی ئێرانی فیدڕاڵ پەیامی پیرۆزباییان بۆ ئەو ڕێوڕەسمە ناردبوو.
لە بڕگەیەکی دیکە سێمینارەکەدا، "شانۆی ڕێبەندان" لە نووسینی "شەریف فەلاح" و بەدەرهێنانی "ساڵح بادپەروا" پێشکەش کرا.
لە درێژەی ڕێوڕەسمەکەدا، دوو شێعر لەلایەن شاعێران "حەمید شەریفی" و "جەزا شابازیـ"ـیەوە پێشکەش کران.
هەروها هونەرمەند زاهید حوسێنی، تابلۆیەکی هونەری کە یەکگرتوویی و هاودەنگیی وێنا دەکرد، کێشرایەوە.
لە بەشێکی دیکەدا، لەلایەن وتەبێژی حیزبەوە چەپکەگوڵی ڕێز و وەفا بۆ خزمەتە هونەرییە بەرچاوەکانی ناسر ڕەزازی پێشکەش بەو هونەرمەندە کرا.
دوایین بەشی ڕێوڕەسمەکە، هونەرمەند مامۆستا "ناسر ڕەزازی" بە چەند سروود و گۆرانی شۆڕشگێڕی ڕێوڕەسمەکەی ڕازاندەوە و بە شایی و هەڵپەڕكێ ڕێوڕەسمەکە کۆتایی هات.
