ڕۆژی شەممە، ٢٧ی بەفرانبار، لە ناوچەی ڕۆگەلاندی وڵاتی نۆروێژ، خوپێشاندانێک بە بەشداریی کوردانی هەر چوار بەشی کوردستان لەگەڵ ژمارەیەک لە هاووڵاتییانی نۆروێژی بە یەکدەنگی و یەکگرتوویی بۆ پشتیوانی لە ڕۆژهەڵات و ڕۆژاوای کوردستان بەڕێوە چوو.
ئەم خۆپیشاندانە بە هاوبەشی چەندین ڕێکخراوی سیاسی، مەدەنی، کوردستانی و نۆروێژی و بە هەوڵ و ماندوویی ژمارەیەک هێز و ڕێکخراوی کوردستانی ڕێک خرابوو.
دواتر چەندین پەیامی سیاسی لەلایەن ڕێکخراوە کوردستانی و نۆروێژییەکانەوە خوێندرانەوە، کە تێیاندا داوای پشتگیریی کۆمەڵگەی جیهانی بۆ گەیشتن بە ماف و داواکارییە ڕەواکانی نەتەوەی کورد کراوە.
هەروەها لەو خۆپیشاندانەدا، دروشمی جۆراوجۆر وەک "ژن، ژیان، ئازادی" و "ڕۆژئاوا و ڕۆژهەڵاتی کوردستان یەک وڵاتن" لەگەڵ چەندین دروشمی دیکە بە زمانی کوردی و نۆروێژی بەرز کرانەوە، ئەو دروشمانە نیشاندەری یەکگرتوویی، هاوئاهەنگی و ئامانجی هاوبەشی بەشداربووان بۆ پشتیوانی لە ڕۆژهەڵات و ڕۆژاوای کوردستان بوو.
بەشداربووانی خوپێشاندانەکە کە لە کوردانی چوار پارچەی کوردستان پێک هاتبوون، بە یەکدەنگی پشتگیری و پشتیوانیی خۆیان لە خۆپێشاندانەکانی ڕۆژهەڵاتی کوردستان و ئێران دژی ڕێژیمی دیکتاتۆری کۆماری ئیسلامی دووپات کردەوە و هەروەها هێرشەکان بۆ سەر ناوچەکانی ڕۆژاوا بەتایبەت ناوچەی حەلەب بە توندی مەحکووم کران.
