ڕۆژی چوارشەممە ٨ی ڕیبەندانی ١٤٠٤(٢٠٢٦/١/٢٨) لە وڵاتی بێلژیک و لە شاری برووکسێل خۆپیشاندانێکی بەرین لەلایەن کوردستانییان و چەندین ڕێکخراوی مەدەنی بە بەشداریی ئەندامان و لایەنگرانی حیزبی دێموکراتی کوردستانی ئێران لەم وڵاتە و لە بەردەم پارلەمانی ئورووپادا بەرێوە چوو.
ئەم خۆپیشاندانە بە بەشداریی ئەندامان و لایەنگرانی حیزبی دێموکراتی کوردستانی ئێران بە سەرپەرستی بەرێز کامیل ئازەریوون ئەندامی دەستەی بەرێوەبەریی کۆمیتەی بێلژیک و جەماوەرێکی بەرچاو لە کوردستانییانی هەر چوارپارچەی کوردستان و خەڵکی وڵاتی بێلژیک بەرێوە چوو.
شایانی باسه کە لەنێو خۆپیشاندەراندا خەڵکی وڵاتی بێلژیک و ئەندام پارلەمانەکانی یەکیەتیی ئورووپا دەبیندران و پاڵپشتیی خۆیان بۆ کوردانی ڕۆژاوا و ڕۆژهەڵاتی کوردستان بۆ وەدەستهێنانی مافەکانی خۆیان وەک گەلێک دەربڕی.
خۆپیشاندانەکە به وتنەوەی سروودی ئەی ڕەقیب دەستی پێ کرد.
خۆپیشاندەران بە وتنەوەی دروشم پشتگیریی خۆیان بۆ ڕۆژاوا و ڕۆژهەڵاتی کوردستان دەربری.
لە بڕگەیەکی تری خۆپیشاندانەکەدا چەندین کەسایەتیی کوردستانی و ئەندامانی پارلەمان قسەیان کرد و پاڵپشتیی خۆیان بۆ نەتەوەی کورد لە ڕۆژهەڵات و ڕۆژاوا دووپات کردەوە.
لە کۆتاییدا خۆپیشاندەران بە وتنەوەی دروشمی شۆڕشگێڕانە وەک دروشمی "ژن، ژیان، ئازادی"، "ڕۆژاوا ڕۆژهەڵاتە، کوردستان یەک وڵاتە" بە زمانەکانی کوردی و ئینگلیزی کۆتاییان بە خۆپیشاندانەکە هێنا.
