ڕۆژی چوارشەممە، ٢٧ی ڕەشەمە، لەسەر بانگهێشتی فەرمیی پارتی سەوزی ئاڵمان و بە سەرپەرشتی خاتوو "بێریڤان ئایماز"، هەیئەتێکی حیزبی دێموکراتی کوردستانی ئێران بە سەرۆکایەتی خاتوو "نەرمین عوسمانی" بەشدارییان لە دانیشتنی ١٨٠ی کۆبوونەوەی پارلەمانی هەرێمی نۆرد ڕاین وێستفالێن کرد.
لەم دیدارەدا کە سەرۆکی پارلەمان و ژمارەیەکی بەرچاو لە پەرلەمانتارانی حیزبە جیاوازەکانی ئاڵمان ئامادەی بوون، تیشک خرایە سەر دۆخی هەستیاری ئێستا و ڕۆڵی هێزە سیاسییەکانی ڕۆژهەڵاتی کوردستان لە ئاڵوگۆڕە چاوەڕوانکراوەکانی داهاتوودا.
خاتوو نەرمین عوسمانی لە وتەیەکدا وێڕای ئاماژەدان بە مێژووی ٤٧ ساڵەی تێرۆر و چەوسانەوەی نەتەوەکان لەلایەن کۆماری ئیسلامییەوە، جەختی کردەوە کە ئەم ڕێژیمە نەک تەنیا بۆ گەلی کورد و نەتەوە غەیرە فارسەکان، بەڵکوو هەڕەشەیەکی ڕاستەوخۆیە بۆ سەر ئەمنییەتی جیهان و ناوچەکە.
ناوبراو بە وەبیرهێنانەوەی تێرۆری دوکتور قاسملوو و دوکتور شەڕەفکەندی لە نێو جەرگەی ئورووپادا، داوای پشتیوانیی کۆمەڵگەی نێودەوڵەتی بۆ ماف و ئازادییەکانی نەتەوەی کورد کرد.
لە بەشێکی تری دیدارەکەدا، هۆشداری درا لە مەترسیی سەرهەڵدانەوەی جۆرێکی تری دیکتاتۆریەت لە پاشماوەکانی ڕێژیمی پێشوو کە بە دروشمی "یەک ئاڵا و یەک ڕێبەر" هەڕەشە لە فرەچەشنی و دێموکراسی دەکەن.
هەروەها باس لە هێرشە مووشەکی و دڕۆنییەکانی کۆماری ئیسلامی بۆ سەر کەمپی بنەماڵەکانی حیزبە کوردییەکان لە باشووری کوردستان و کاریگەرییە خراپە دەروونییەکانی لەسەر منداڵان کرا.
ئەم دیدارە بە پێشوازییەکی گەرم و جەختکردنەوە لەسەر بەردەوامیی پەیوەندییەکان و ڕێکخستنی پرێس کۆنفرانسێک بۆ میدیاکانی ئاڵمان لە داهاتوویەکی نزیکدا کۆتایی هات.
