چارەنووسی دوو هاووڵاتیی خەڵکی پیرانشار بە ناوەکانی "مەحیەدین مەعرووفنیا" و کوڕەکەی، "بێهنام مەعرووفنیا"، دوای تێپەڕبوونی زیاتر لە حەوتوویەک بەسەر دەستبەسەرکرانیان لەلایەن هێزە ئەمنییەتییەکانەوە، بە نادیاری ماوەتەوە.
بەپێی ڕاپۆرتی هەنگاو"، سەرەڕای بەدواداچوونی بەردەوامی بنەماڵەی ئەم دوو هاووڵاتییە، ناوەندە ئەمنییەتییەکانی ڕێژیم لە پێدانی هەر چەشنە زانیارییەک سەبارەت بە شوێنی ڕاگرتن و بارودۆخیان خۆ دەبوێرن.
ئەم ناروونیە لە کاتێکدایە کە بنەماڵەی مەعرووفنیا (قەلاش) لە دۆخێکی نالەباری دەروونیدا بەسەر دەبەن.
مەحیەدین مەعرووفنیا و بێهنام مەعرووفنیا، حەوتووی ڕابردوو بەبێ نیشاندانی هیچ جۆرە بەڵگەیەکی یاسایی لەلایەن هێزە ئەمنییەتییەکانی ڕێژیم دەستبەسەر کراون و لە کاتی دەستبەسەرکرانیانەوە تا ئێستا، لە مافە سەرەتاییەکانی وەک دەستڕاگەیشتن بە پارێزەر و پەیوەندیی تەلەفۆنی یان چاوپێکەوتن لەگەڵ بنەماڵەکانیان بێبەش کراون.
شایانی باسە کە تا ئێستا زانیارییەکی ورد لەسەر هۆکاری دەستبەسەرکردن و ئەو تۆمەتانەی کە دراونەتە پاڵ ئەم باوک و کوڕە لەبەردەستدا نییە و ناڕوونیی دۆخیان مەترسییەکانی لەسەر گیانیان زیاتر کردووە.
