پاش تێپەڕبوونی چوار ڕۆژ لە دەسبەسەرکرانی هاووڵاتییەکی خەڵکی مەهاباد بە ناوی ئەمیر سلێمانی، زانیارییەک لەسەر چارەنووس و شوێنی ڕاگیرانی لەبەر دەستدا نییە.
ئەمیر سلێمانی خەڵکی گوندی «خوڕخوڕە»ی سەر بە ناوچەی «شاروێرانی» مەهابادە کە لە درێژەی شەپۆلی دەسبەسەرکردنی سەرەڕۆیانە و بەکۆمەڵی هاوڵاتییانی کورد بەشێوەیەکی سەرەڕۆیانە دەسبەسەر کراوە و بۆ شوێنێکی نادیار ڕاگوێزراوە.
برایەکی ناوبراو بە ناوی حیسام سلێمانی ساڵانێکە لە ڕیزەکانی حیزبی دێموکراتدا پیشمەرگایەتی دەکات و ئەم گوشارخستنە سەر بنەماڵەی چالاکوانانی سیاسیی دەرەوەی ئێران، لە ڕێکارە پێکهاتەیی و ترسێنەرەکان دژ بە هاوڵاتییانی کوردە.
بەرەبەیانیی ڕۆژی شەممە ٢٤ی گەلاوێژ، هێزەکانی ڕێژیم هەڵیانکوتاوەتە سەر ماڵی ناوبراو و بەبێ بەڵگەی یاسایی دەسبەسەریان کردووە.
ئەمیر سلێمانی ٤٤ ساڵیەتی، خێزاندارە و باوکی دوو منداڵە.
هەتا کاتی بڵاوبوونەوەی ئەم هەواڵە، سەبارەت بە هۆکارەکانی دەسبەسەرکردن و تۆمەتە وەپاڵدروەکان دژی ئەم هاوڵاتییە کوردە زانیارییەک لەبەر دەستدا نییە و هێزە ئەمنییەکانیش لەمبارەیەوە هیچ ڕوونکردنەوەیەکیان نەداوە.
