ڕۆژی دووشەممە ٢ی خەرمانانی ١٤٠٥، كاک عەزیز ڕەشیدی پێشمەرگەی پێشووی حیزبی دێموکرات و خەڵکی ئاوایی دولکانی سەر بە ناوچەی ئالان و کەسایەتیی خۆشناوی شاری سەردەشت، نەهۆی نەخۆشییەوە کۆچی دوایی کرد.
ناوبراو لە بنەماڵەیەكی هەژار و دەستكورت لە دایک بوو، سەرەڕای ئەوەی بەهۆی نەدارییەوە هەلی خوێندنی بۆ نەڕەخسا، بەڵام هەموو کات هەوڵی فێربوون و خۆپێگەیاندنی دەدا.
ناوبراو خاوەن هەستێکی شۆڕشگێڕانە و نیشتمانپەروەرانە بووە و هەر بەو هۆیەوە دوای سەرکەوتنی شۆڕشی گەلانی ئێران لە ساڵی ٥٧دا و ڕاگەیاندنی خەباتی ئاشکرای حیزبی دێموکرات، پێوەندیی تەشکیلاتی بە حیزبەوە گرت و وەک ئەندامێکی هەڵسووڕ و چالاک، ئەرکە حیزبییە پێئەسپێردراوەکانی بەوپەڕی دڵسۆزییەوە بەجێ دەگەیاند.
دواتر ناوبراو بووە پێشمەرگە و هەتا ساڵی ٦٤ی هەتاوی وەک پێشمەرگەیەکی ئازا لە دەیان چالاکیی پێشمەرگانەدا بەشداری کردووە.
دواتر لەسەر ئیزنی حیزب و لە ساڵی ٦٤ بەهۆی هەژاریی بنەماڵەکەیەوە چووەوە نێوخۆ و سەرەڕای ئەوەش هیچکات دڵی لە خەبات و شۆڕشی ڕەوای گەلەکەی سارد نەبوویەوە و وەفادار بە ڕێبازی پڕسەروەریی حیزبی دێموکرات مایەوە.
تەرمی ناوبراو لەنێو ئاپۆڕای خەڵکی ناوچەی ئالاندا بە خاکی پیرۆزی کوردستان سپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە پرسە و سەرەخۆشی لە بنەماڵە و کەسوکاری ناوبراو دەکات و خۆی بە هاوبەشی خەمیان دەزانێت.
