پبه‌شدارانی به‌ڕێزی کۆنگره!
میوانانی خۆشه‌ویست!
ژنانی تێکۆشه‌رو خۆڕاگری کوردستان!
کۆنگره‌ی چواره‌می یه‌کیه‌تیی ژنانی دێموکراتی کوردستان له هه‌لومه‌رج و بارودۆخێک دا ده‌به‌سترێ که رۆژهه‌ڵاتی نێوه‌ڕاست به گشتی و کوردستان و ئێران رووبه‌رووی کۆمه‌ڵێک قه‌یران و ئاڵۆزیی نێوخۆیی و ناوچه‌یی بۆونه‌ته‌وه. شه‌ڕو ماڵوێرانی له به‌شێکی به‌رچاوی ناوچه‌که، به‌رۆکی خه‌ڵکی گرتوه وکاره‌ساتی زۆر گه‌وره‌و دڵته‌زێن ڕوویان داوە که ویژدانی مرۆڤایه‌تیان هه‌ژاندوه ، شه‌ڕ و تیرۆر ته‌نیا هه‌ڕەشه بۆ سه‌ر ئه‌و نەتەوە و ولاتانه نه‌بوون که راسته‌وخۆ ڕووبه‌ڕووی هێرش‌و په‌لامار بوونه‌تەوه و قوربانی ده‌ده‌ن، به‌ڵکو مه‌ترسییه‌کی گه‌وره‌شن بۆ سه‌ر مرۆڤایه‌تی و گشت ئه‌و شارستانیه‌ت و پێشکه‌وتنانەی کولتوری به‌یه‌که‌وه ژیانی سه‌رده‌میانه‌یان لە سەر بنیات نراوە. ناوچه ئاوسانی ڕووداوگه‌لێکه که مه‌ترسیەکی گه‌وره‌یان له سه‌ر سه‌قامگیری و ئاشتی و هیمنایه‌تیی ناوچه‌که دروست کردوه. له ره‌وتی رووداوه‌کانی ئەمساڵ دا شاهیدی زۆر کارەساتی دڵته‌زین هەر لە کوشتاری خه‌ڵکی بیدیفاع وسیڤیلەوە هەتا خاپوور بوونی گوند و شاره‌کان بووین. نەتەوەی کورد له باشوور و رۆژئاوای کوردستانیش له‌و کاره‌ساتانه بێبه‌ش نه‌بوون. هێرشکردنی چەکدارانی گرووپی تیرۆریستیی داعش بۆ سه‌ر هه‌ریمی کوردستان، کوژران و به دیلگیرانی هه‌زاران که‌س له ژن و منداڵ و پیاوانی ئێزه‌دی و که‌مه ئایینی و نه‌ته‌وه‌یی کانی دیکه و ئاواره و ده‌ربه‌ده‌ر بوونی سه‌دان هه‌زار که‌سی لێکەوتەوە. ده‌ستدرێژی کرایه سه‌ر ژنان و کچانی کورد و له بازاره‌کان کرین و فروشتنیان پێوه کرا. ئه‌م رووداوانه له سه‌ده‌ی 21 دا وه‌بیرهێنه‌ره‌وی سەردەمی جه‌هاله‌ت و زینده‌به‌چاڵ کردن بوون کە هەڕەشە بوون بۆ سەر ویژدان و که‌رامه‌ت و که‌سایه‌تیی مرۆڤ.
مۆتەکەی تیرۆر و گەڕاندنەوەی مرۆڤەکان بۆ سەردەمی تاریکی لەم ناوچەیە، لە کاتیک دایە کە له ئێران و له سێبه‌ری کۆماری ئیسلامی‌دا، زیاتر لە 36 ساڵە خەڵک تامی تاڵی دەسەلادارەتی لە ژێرناوی دین دا دەچێژن.سەرەرای ئەو هەمووە کۆت و بەندەش کە ئەم ڕێژیمە بۆ دەست و پێی خەڵکی وڵات دروستی کردوە، بە هۆی سیاسەتە چەوتەکانیان هەر جارەی بوحرانێک دەخولقینن کە دووکەڵەکەی دەچێتە چاوی خەلکی وڵات. لە بنەڕەت‌دا ئەوە, سیاسەتە چەوتەکانی ئەو ڕیژیمەیه لە بوارەکانی سیاسی، ئابووری، کۆمەڵایەتی و کولتووری دا کە بوونە هۆی پێکهاتنی زۆرترین نەهامەتی بۆ خەڵکی ئیران. هەر لە نەبوونی ئازادی و بێبەشی لە سەرەتایی‌ترین مافە ئینسانیەکان رابگرە تا دەگاتە زیندان و ئەشکەنجە و ئیعدام و گرانی و بێکاری و ماددە سرکەرەکان و دەیان و سەدان بەڵای دیکە.
لە کوردستان بە هۆی بوونی خەباتێکی ڕەوا و وشیاریی سیاسی و کۆمەڵایەتیی خەڵکەکەی، ڕێژەی جیاوازیدانان و سەرکوت لەچاو بەشەکانی دیکەی ئێران زۆر زیاترە. دەسەلاتداران و کاربەدەستان هەمیشە بەچاوی ئەمنییەتی دەڕواننە کوردستان، خەڵکی کوردستان لە نابەرابەری و زوڵم و زۆر و ، ڕاوەدوونان و زیندان و ئەشکەنجە و ئێعدام بە تاوانی سیاسی و جیابیری، لە چاو بەشەکانی دیکە ئێران پشکی شێریان پێ بڕاوە. کوردستان ئێستاش بە بەراورد لە گەڵ سەرانسەری ئێران چالاک‌ترین و بەهێزترین مەیدانی خەبات و خۆراگری لە دژی سەرەڕۆیی و کۆنەپەرستیە.
کۆماری ئیسلامی بۆ دەربازبوون لەو هەمووە بوحران و کێشەیەی تووشی بووە، داماوه لە چارەسەرکردنی دووبەرەکی و ململانێی نێوان باڵەکانی دەسەڵات، بۆ لادانی سەرنجی بیروڕای گشتی لە کێشە ناوخۆیی‌یەکانی هه‌ولی داوه، سەرنجیان بۆلای کێشە دەرەکیەکانی رابکێشێ. بۆ پاراستنی بەرژەوەندیەکانی خۆی ،بە دەست تێوەردان لە کاروباری وڵاتانی ناوچەکە، ئاگری شەڕێکی درێژخایه‌نی خۆش کردوە کە دوور نیە هەزاران قوربانیی لێ بکەوێتەوە. ململانیە ناوچەیەکانی لە ڕیگای بەکارهێنانی هەستی مەزهەبی بەتایبەتی لە وڵاتانی عێراق ، سووریا ، لوبنان و یەمەن کردۆتە ئامرازێکی گوشار بۆسەر وڵاتانی رۆژئاوایی و بەشێک لە وڵاتانی عەرەبی و کەنداو.
پرسی ئەتۆمی و ڕەوتی دانوستانەکان لەگەڵ وڵاتانی 5+1ی تا ئێستا بە ناڕوونی هێشتۆتەوە و هەوڵ دەدا بۆ وەدەست هێنانی کات و دەرفەتی زیاتر بۆ گەیشتن بە مەبەستەکانی، بەڵام بە پێی لێکدانەوە و هەڵسەنگاندنی زۆر لە چاوەدێرانی ئەم بوارە، ئەو ڕێژیمە جگە لە ملدان و قەبووڵ کردنی مەرجەکانی رۆژئاوا هیچ رێگایەکی دیکەی لەبەردەم‌دا نەماوە. ئەوەش دەبێتە پاشەکشەیەکی دیکەی سیاسی، سەڕەڕای ئەو هەمووە کێشە و گرفتانەی لە ئاکامی سیاسەتی ناوکیی تا ئیستای ئەو ڕێژیمە، داوێنگیری خەڵکی ئێران بووە. .
ژنانی تێکۆشەر و خەباتکار!
چارەنووسی ژنان لە هەر سەردەمێک دا بە رووداو و ئالوگۆڕەکانی ئەو سەردەمەوە گرێدراوە. ژنان هەر وا کە لە بزووتنەوە وئاڵوگۆرە سیاسی و کۆمەڵایەتی و کولتوریە پێشکەوتنخوازانەکان دەسکەوتیان هەبووە، لە شەڕەکان و قەیرانەکانیشدا گەورەترین قوربانیانی کارەساتەکان بوون. یا بۆ خۆیان ڕاستەوخۆ بوون بە نێچیری دەستی زولم و زۆرداری ، یا مێرد وکوڕ و ئەندامانی دیکەی بنەمالەیان لە دەست داوە ، بەڵام لەگەڵ هەموو زیان و تێچوویەک کە لە سۆنگەی شەڕەکان و قەیرانەکان تووشیان دەبێ، هەمیشە کەمترین ماف و دەسکەوتیان هەبووە.
سەرەڕای ئەمەش ژنان لە خەبات و بەربەرەکانی لە دژی سەرەڕویی نەوەستاون و رۆژ لەگەڵ رۆژ لەو مەیدانە دا چالاکتر بوون. رێکخراوەکانی ژنان و کۆڕ و کۆمەڵەکانی داکۆکیکاری مافەکانی ژنان بە دژی ستەم و هەڵاواردنی رەگەزی وەستاونەوە. ژنان، لە بزووتنەوە سیاسی و مەدەنییەکانی سەردەمی ئیستا دا هێزێکی دیار و شوێندانەرن. بە خۆشحاڵییەوە لە خەبات و چالاکییە مەدەنییەکانی ڕۆژهەلاتی کوردستانیش دا، ژنان بەشدارییەکی حاشاهەڵنەگریان هەیە. ژنان لە هەڵومەرجی ناسک و ئاستەمی ئێستادا ئەرکی گەورە و گرینگیان لەسەرشانە، ئەویش بەبێ بوونی بەرنامەیەکی باش و سەردەمیانە و رێکخستنی توند و تۆڵ و بی هەبوونی ئیرادە و هاوکاری و هەماهەنگیی رێکخراوەیی لە نێو یەکیەتیەکانی ژنان نایەتەدی. پەیوەندی و هاوکاریی نێوان رێکخراوەکانی ژنان لە رۆژهەڵاتی کوردستان لە گەڵ یەکتر، هەر وەها پێوەندی و هاوکاری لەگەڵ رێکخراوەکانی ژنان لەسەرانسەری ئێڕان و بەشەکانی دیکەی کوردستان یارمەتیدەر ده‌بن بۆ بەرەوپێشچوونی بزووتنەوەی ژنان و گەیشتنی بە داخوازەکان. ئەوەش بە متمانەبەخۆبوونی ژنان و ئیرادە و لێهاتوویی ژنان دێتە بەرهەم. دڵنیاین ئێوە وەک یەکیەتییەکی بە ئەزموون و خاوەن رابردوو،توانا و ئیراده‌ی جێبەجیکردنی ئه‌م ئه‌رکانه‌تان هه‌یه.
بەشدارانی بەڕێزی چوارەمین کۆنگرەی یەکیەتیی ژنانی دیموکراتی کوردستان!
حیزبی دیموکراتی کوردستان سەرەڕای سەختی و نالەباربوونی قوناغەکانی ژیان و تێکۆشانی خۆی، لە بایەخدان بە پرسی ژنان لە کۆمەڵگەدا غافڵ نەبووە و دژی ئەو ستەم و هەڵاواردن و کێشانەی بەرەوڕووی ژنانی کوردستان بووەتەوە، خەباتی کردوە. پشتیوانی و هاوکاری کردنی ژنان لە پێناوی مافە ڕەوا و ئینسانیەکانیانی بە ئەرکێکی سەرەکیی خۆی زانیوە. بۆ نیو سەدە دەچێ کە دابینکردنی مافی یەکسانی ژنان لەگەڵ پیاوان بووە بە یەکێک لە خاڵە بنەرەتیەکانی بەرنامەی حیزبی دیموکراتی کوردستان. حیزبی دیموکرات بە کردەوە لە دژی داب و نەریتی دواکەوتوانە و پیاوسالارانەی کۆمەڵگا، بە تایبەتی لە پێوەندی لە گەڵ ژنان دا خەباتی کردەوە. لەمەودواش تێدەکۆشێ بەهەموو تواناوە یارمەتیدەر و پشتیوانی خەباتی ژنان بۆ گەیشتن بە ئامانجەکانیان بێ. حیزبی ئێمە بە ئاگاداری لە گرنگیی نەخش و دەوری ژنان لە بزووتنەوەی ئازادیخوازی دا، بە بایەخپیدانەوە دەڕوانێتە تێکۆشان و چالاکییەکانی یەکیەتیی ژنانی دیموکراتی کوردستان و هەر وەک تا ئێستا لە هاوکاری و پشتیوانیکردنی ئەم یەکیەتییە درێغی نەکردوە لە داهاتووش دا درێغی ناکا.
ئەندامانی بەڕێزی کۆنگرە!
ئەم کۆنگرەیەتان کە لە بەرەبەری69 ساڵەی دامەزرانی یەکیەتییەکەتان‌دا پێک هاتوە، دەتوانێ کاریگەریی زۆر باشی لە سەر تێکۆشانی داهاتووی یەکیەتیی ژنان هەبێ، بەو مەرجەی ئەندامانی کۆنگرە پرسی ژن لە کوردستان و ئێران بە دروستی بخەنە بەر باس و، بڕیار و بەرنامەی باش بۆ یەکیەتییەکەیان پەسند بکەن و بەڕێوەبەرییەکی گونجاو بۆ دەورەی نوێی تیکۆشانی ئەم یەکیەتییە هەڵ بژێرن. ئێمە بە بۆنەی ئەو کار و ئەرک و بەرپرسایەتییانەی لە ماوەی نیوان دوو کۆنگرەدا لە سەر شانیان بووە، ماندوونەبوونی لە بەڕێوەبەریی هەڵبژێراوی کۆنگرەی سێهەم دەکەین. هیوامان سەرکەوتنی ئەم کۆنگرەیە و بەردەوامی و بەرەوپێشچوونی ڕۆژبەڕۆژ زیاتری یەکیەتیی ژنانی دیموکراتی کوردستانە.
سەرکەوێ خەباتی ژنان لە پێناوی وەدەست هێنانی مافە رەوا و سینفیەکانیان‌دا.
حیزبی دێموکراتی کوردستان
دەفتەری سیاسی
20/12/1393 هەتاوی
