ڕۆژی هەینی ٢١ی جۆزەردان شاندێکی کۆمیتەی گشتیی حیزبی دێموکراتی کوردستانی ئێران لە سوید، بە سەرپەرستیی "ئەبووبەکر ڕەحمانی" بەرپرسی کۆمیتە، لە ڕێوڕەسمی پرسە و بە خاکسپاردنی "دایە "مریەم ڕۆستەم پوور" لە شاری "ڤێسترۆس" بەشداریی کرد.
سەرەتا پەیامی بنەماڵەی کۆچکردوو لەلایەن "عەلی درەختی" خوێندرایەوە.
"دەرختی" باسێکی تێروتەسەلی لەسەر ژیاننامەی دایە "مریەم" و بنەماڵەی خۆڕاگر و بوێری ناوبراو وەک شێرەژنێکی کوردپەروەر و دێموکرات پێشکەش کرد کە هەردەم یارمەتیدەری پێشمەرگە بوونە و لەو پێناوەدا دوو کوڕی بە ناوەکانی شەهید "محەممەد عەزیزی و ڕەسووڵ عەزیزی" کە گیانیان لە ڕێگای ئازادیی گەل و نیشتمان بەخت کردووە.
پاشان "ئەبووبەکر ڕەحمانی" بەرپرسی کۆمیتەی گشتیی حیزبی دێموکراتی کوردستانی ئێران لە سوید پەیامی کۆمیتەی پێشکەش کرد.
"ڕەحمانی" لە وتەکانیدا دایە "مریەمـ"ـی وەک هێمای شێرەژنی کورد و نموونەیەک لە ژنانی ئازا و بەجەرگی نێو شۆڕش و بزووتنەوەی ڕزگاریخوازیی گەلەکەمان وەسف کرد و پەیامی سەرخۆشی و هاوخەمیی حیزبی دێموکراتی بە بنەماڵەی دایە "مریەم" ڕاگەیاند.
لە بەشێکی دیکەی ڕێوڕەسمەکەدا پەیامی هاوخەمیی مامۆستا مەلا "حەسەن شێوەسەڵی" لەلایەن "ئاوارە جەلالی" خوێندرایەوە.
مامۆستا لە پەیامەکەیدا وێڕای دەربڕینی خەم و پەژارەی بۆ کۆچی دوایی دایە "مریەم" و هاوخەمیی حیزبی "دێموکراتیـ"ـشی بە بنەماڵەی "ڕۆستەم پوور و عەزیزی" ڕاگەیاند و خۆڕاگری و قارەمانیەتیی دایە مریەمی بە جوانی بۆ بەشداربووان ڕوون کردەوە.
لە درێژەی پەیامەکەیدا باسی لە زوڵم و زۆر و هێرشی ڕێژیمی ئاخوندی بۆ سەر خاکی کوردستانی ڕۆژهەڵات بە گشتی و هێرش بۆ سەر شاری سەردەشت و گوندەکانی "بێور و بێوران" بە تایبەتی کرد کە بە چەکی قورس و فڕۆکە خەڵکی سڤیلیان کردە ئامانج.
هەروەها باسی لە قارەمانێتیی خەڵکی "بێور" و ئەو دەڤەرەی کرد کە چۆن ئازایانە و قارەمانانە بەرەنگاری ئەو هێزە داگیرکەرەیان کردووە و چەندین جار شکەستیان بە داگیرکەران هێناوە، باسی شەهیدبوونی قارەمانی و خۆڕاگریی ئەو شەڕە قورسەی بە ناوی "محەممەدئەمینی مەلا عەزیزی" کرد.
مامۆستا بە تێروتەسەلی باسی ئەو ڕووداوانەی کرد کە لە بێور و بێوران ڕووی دابوو، هەروەها لەسەر بەتاڵانبردنی سەروەت و سامانی کوردستان باسی کرد کە لەلایەن ڕێژیمی نەگریسی ئاخوندییەوە براوە و تێک دراوە.
لە درێژەدا باسێکی تێروتەسەلی لە هەموو خۆڕاگرییەکانی دایە "مریەم" و بنەماڵەکەی کرد کە پاش ساڵانێکی زۆر دەربەدەری و کەمپنشینی ژیانی پڕ لە مەرگەسات، هاوکات لەگەڵ دەیان بنەماڵەی بێورەکان کە پەڕیوەی وڵاتانی ڕۆژاوا و ئورووپا بوونە کرد کە سەرەڕای تەواوی ئەو نەهامەتییانە لەسەر بیر و باوەڕی، ئازایانەی خۆیان مانەوە و تا ئیستاش سەریان بۆ ڕێژیمی ئیسلامیی ئێران شۆڕ نەکردووە و بە باوەڕی توندەوە لەسەر ڕێگای بەرەنگاری و خەبات و تێکۆشان بەردەوام ماونەتەوە.
لە کۆتاییدا مامۆستا باسێکی لەسەر وەسفی قارەمانانەی شەهید "ڕەسوول عەزیزی و محەممەد عەزیزی و ڕەحمان مەرەخانی" و باقیی قارمانانی دیکە کرد.
