خۆپێشاندان و کۆبوونەوە لە بەردەم پارلمانی نۆروێژ دژی هێرشەکانی ڕێژیمی ئێران بەڕێوە چوو
ڕۆژی هەینی ڕێکەوتی ١٧ی سپتامبری ۲٠۲۱ی زایینی، کاتژمێر ٢ ی دوا نیوەڕۆ خۆپێشاندان و کۆبوونەوە بە نیشانەی ناڕەزایەتی و مەحکوومکردنی ڕێژیمی کۆماری ئێسلامیی ئێران، لە بەردەم پاڕڵمانی نۆروێژ لە شاری "ئۆسلۆ" لەلایەن ناوەندی ھاوکاریی حیزبەکانی کوردستانی ئێران بەڕێوە چوو.
ڕێوڕەسمەکە بە سروودی نەتەوایەتی " ئەی ڕەقیب" و خولەکێک بێدەنگی بۆ ڕێزگرتن لە گیانی پاکی شەهیدانی ڕێگای ئازادی کورد و کوردستان دەستیپێکرد.
پاشان لەلایەن " ئیبراهیم کۆنەپۆشی"، " بەفرین رۆستەمی" و" ئالان خاس " بە هەر دوو زمانی کوردی و نۆروێژی بەخێرهاتنی بەشداران کرا و چەندین دروشمی کوردی و نۆروێژی و فارسی بۆ پشتیوانی لە هێزەکانی رۆژهەڵاتی کوردستان و دژی رێژیمی کۆماری ئیسلامی ئێران لە لایەن بەرێوەبەران و بەشدارانی خۆپێشاندان گوترانەوە.
دواتر پەیامی ناوەندی هاوکاری حیزبەکانی کوردستانی ئێران بە کوردی لەلایەن " خوسرەو قادری" و بە نۆرویژی لەلایەن "موژدە چاوشینی" خوێندرایەوە.
لە پەیامی ناوەندی هاوکاریدا هاتبوو؛ دیارە ئەوە یەکەم جار نییە کە کۆماری ئیسلامیی ئێران بە بەزاندنی سنوور و پێشێلکردنی سەروەریی وڵاتانی دراوسێ، هەڕەشە لە گیان و ماڵ و سامانی خەڵکی مەدەنی و نانەوەی ئاژاوە و بشێوی لە ناوچەکەدا دەکات و ئەو ڕێژیمە بە خوڵقاندنی کارەسات و کوشتن و تێرۆر و تاوان دژ بە مرۆڤایەتی خووی گرتووە و شوناسی خۆی لەگەڵ قەیران و ناسەقامگیری گرێ داوه.
لە بەشێکی دیکەی پەیامی ناوەندی هاوکاریی حیزبەکانی کوردستانی ئێران وێرای ئاماژە بە قەیرانەکانی ناوخۆیی رێژیمی ئاخوندی ئێراندا هاتبوو:
کۆماری ئیسلامی لەنێوخۆی وڵاتدا تووشی دەیان قەیرانی چارهەڵنەگر بووە و لە ماوەی تەمەنیدا وا ڕاهاتووە کە بۆ خۆدزینەوە لە چارەسەریی قەیرانێک، قەیرانێکی دیکە بخولقێنێت. هەر بۆیە ئەمجارەش بە کەڵکاژۆوەرگرتن لە دۆخی سیاسیی ناوچەکە و دانبەخۆداگرتنی کۆمەڵگای نێودەوڵەتی لە هەمبەر تاوان و دەستدرێژییەکانی، پێی وایە بە چاوسوورکردنەوە لە خەڵکی مەدەنی و هەڕەشە لە ماڵ و حاڵی پەنابەرانی سیاسی، دەتوانێ کاریگەری لەسەر ئیرادەی سیاسیی نەتەوەی کورد و ڕێکخراوە خەباتکارەکانی دابنێت و بە ئامانجە گڵاوەکانی خۆی بگات."
لە کۆتایی پەیامی ناوەندی هاوکاری دا وێرای مەحکوومکردنی ئەو هەڕەشە و هێرشانەی ڕێژیمی ئێران، داوای لە بیروڕای گشتیی خەڵکی کوردستان، ئازادیخوازان، هێز و لایەنە سیاسییەکانی کورد لە هەر چوار بەشی کوردستان، حکوومەتی هەرێمی کوردستان و عێراق و کومەڵگای نێودەوڵەتی دەکات سنوورێک بۆ زیادەڕۆییەکانی ئەو ڕێژیمە دابنێن و بە هەڵوێست و کردەوەی خۆیان، لە بەرانبەر ئەو هەوڵە تێکدەرانەیەی ڕێژیمی ئێراندا بوەستنەوە.
جێگای ئاماژەیە کە بە سەدان ئەندامی حیزبە کوردستانییەکان، کەسایەتییە سیاسییەکان و کوردانی دانیشتووی نۆروێژ بەشداری ئەو خۆپیشاندانە بوون و بۆ مەحکوومکردنی هێرش و تۆپبارانی بنکە و بارەگاکانی لایەنە سیاسییەکانی ڕۆژهەڵاتی کوردستان دەنگیان خستە پاڵ دەنگی هێزەکانی خەباتکاری کوردستان.
هەروەها پەیامی ناوەندی هاوکاری حیزبەکانی کوردستانی ئێران بە زمانی نۆروێژی لە سەر شەقام و خەڵکی نۆروێژی بڵاوکرایەوە کە لەگەڵ پێشوازی خەڵکی بیانی بەرەوڕوو بوو.
شایانی باسە کە خۆپیشاندانەکە بە چەندین سروودی شۆڕشگێڕی لەلایەن هونەرمەند " شێرکۆ مەریوانی" و دروشم بە زمانی نۆروێژی، فارسی و کوردی کۆتایی پێهات.
