ڕۆژی شەممە ٦ی خاکەلێوە، کۆمیتەی حیزبی دێموکراتی کوردستانی ئێران لە وڵاتی بێلژیک بەبۆنەی ١٠ی خاکەلێوە ڕۆژی شەهیدانی کوردستان بە بەشداریی بەشێکی بەرچاو لە بنەماڵەی سەربەرزی شەهیدانی دانیشتووی وڵاتی بێلژیک ڕێوڕەسمێکی بەڕێوە برد.
سەرەتای ڕێوڕەسمەکە بە سروودی دوژمن بەزێنی ''ئەی ڕەقیب'' و پاشان ڕاگرتنی خولەکێک بێدەنگی بۆ ڕێزگرتن لە گیانی پاکی سەرجەم شەهیدانی کورد و کوردستان ڕێوڕەسمەکە دەستی پێکرد .
پاشان لەلایەن ''بەها ئیبراهیمی'' بەرپرسی کۆمیتەی حیزب لە بێلژیک وێڕای بەخێرهاتنکردنی سەرجەم ئامادەبووان، بەخێرهاتنی تایبەتی بنەماڵەی سەربەرزی شەهیدان ی دانیشتووی وڵاتی بێلژیک کرد و ئامانج لە گرتنی ئەو ڕێوڕەسمە و بە گشتی ئامانج لە دیاریکردنی ١٠ی خاکەلێوە وەک ڕۆژی شەهیدانی کوردستان لەلایەن حیزبی دێموکراتی کوردستانی ئێرانەوە بۆ ئامادەبووان شی کردەوە.
لەو ڕێوڕەسمەدا دوو بابەت لەلایەن ''کاوە ئاهەنگەری'' و ''دارا ناتق'' پێشکەش کران. .
''کاوه ئاهه‌نگه‌ری'' وێڕای ڕێز بۆ گیانی پاکی شه‌هیدان کۆمار و هه‌موو شه‌هیدانی ڕێگای ڕزگاریی کوردستان، ئاماژه‌ی به فه‌لسه‌فه‌ی خاک و گه‌ل لەلای پێشه‌وا قازی محه‌ممه‌د و هۆکاره‌کانی به‌جێ نه‌هێشتنی وڵات بۆ ده‌ربازکردنی گیانی خۆی کرد.
ئاهه‌نگه‌ری سه‌ره‌تا وتی؛ بۆ من زۆر سه‌خته وه‌ک که‌سێک که له ده‌ره‌وه‌ی وڵات ده‌ژیم و وڵاتم بەجێ هێشتووه، باسی که‌سانێک بکه‌م که نیشتمانیان بەجێ نه‌هێشت و لەپێناو نیشتمان و گه‌ل گیانیان به‌خت کرد.
"کاوه ئاهەنگەری" له دڕێژه‌ی وته‌کانی ئاماژه‌ی به دوو چه‌مکی ڕووناکبیر و ڕێبه‌ر کرد که ئه‌گه‌رچی که‌سێک ده‌توانێ یه‌کێک له‌م دووانه بێت، به‌ڵام زۆر که‌من ئه‌و که‌سانه‌ی که هاوکات توانیویانه ئەو دوو تایبەتمەندیانەیان هەبێت.
ناوبراو پێشه‌وا قازی محەممهد یه‌کێک له‌و ده‌گمه‌ن ڕێبه‌رانه‌یه که ڕووناکبیرێکی به مانای ڕاستەقینەی خۆی بوو. ڕووناکبیر بوو، هه‌ر وه‌ک چۆن ڕووناکبیر له هه‌مبه‌ر نه‌ریت و نه‌زمی جێگرتوو و پێگرتوو ده‌وه‌ستێ و هه‌وڵ بۆ گۆڕانی که هه‌یه ده‌دات.
"ئاهەنگەری" باسی لەوە کردووە پێشه‌وا ڕێبه‌ر بوو له‌به‌ر ئه‌وه‌یکه توانی دینامیزمی کۆمه‌ڵگای ئه‌و کات و ویستی له‌مێژینه و مافی ڕه‌وای گه‌له‌که‌ی به‌ڕێوه‌به‌ریی بکات و زۆر خێرا به‌رپرسایه‌تی گه‌لێک له قۆناغ و ڕۆژگارێکی ئاسته‌م له ئه‌ستۆ بگرێت.
کاوە ئاهه‌نگه‌ری ئاماژه‌ی بەوە کرد تایبه‌تمه‌ندییه‌کی به‌هێزی پێشه‌وا قازی محەممهد ئەوە بوو پێشه‌وا هه‌م سیستمی په‌هله‌وی ده‌ناسی و هه‌میش زلهێزه‌کانی جیهان به تایبه‌تی یەکییەتی سۆڤییه‌ت. نه ڕێژیمی په‌هله‌وی زه‌رفیه‌تی گونجاندی به‌رنامه‌ی سیاسیی پێشه‌وا قازی محه‌ممه‌دی هه‌بوو و نه یەکیەتیی سۆڤییه‌ت پشتیوان و هاونه‌زه‌ری به‌رنامه‌ی سیاسیی پێشه‌وا بوو. که وابوو لێره‌دا به باشی هه‌م ڕووناکبیریبوون و هه‌م ڕێبه‌ریبوونی پێشه‌وا قازی محەممەدیان زۆر باشتر بۆ ڕوون ده‌بێته‌وه.
له کۆتاییدا ناوبراو ئاماژه‌ی به ئه‌رکی زۆر ئاسته‌می نه‌وه‌ی نوێ کرد که بۆ په‌ڕاندنه‌وه‌ی گه‌ل و نیشتمان له‌م قۆناغه ئاسته‌مه‌دا به پشتبه‌ستن به ئه‌زموونی تێکۆشه‌رانی دێرین و ڕێبه‌رانی شه‌هیدمان، باشترین هه‌ڵوێست، درێژه‌پێدانی ڕاسان و خه‌باتێکی چروپڕ لەم قۆناغه دایه.
دواتر''دارا ناتق'' لە کاتی پێشکەشکردنی بابەتەکەیدا تیشکی خستە سەر شەهیدان ئەو بەشە لە خەباتکارانن کە بە نرخترین سەرمایەی ژیانیان کە گیانیان بوو فیدای ئازادی و ڕزگاری نەتەوەیی و نیشتمانیان کرد و بوون بە ڕەمز و ڕازی مانەوەی نەتەوەیەکی ژێردەستە و شوناسی نەتەوەیەکی بێ دەوڵەت.
ناوبراو باسی لەوە کرد کە تێکۆشەرانی کورد لە هەر هەلومەرجێکدا و لە دژوارترین قوناغەکانی خەباتدا نەترسانە بەرەو ڕووی زیندان، ئەشکەنجە و ئێعدام بوونەتەوە و هەموو کات ئامادەی گیانبازی و فیداکاری بوون و هەرگیز سەری تەسلیمیان بۆ دوژمنانی کورد و داگیرکەرانی کوردستان دانەنواندووە.
"ناتق" وتی، ڕێژیمی لەنێوچووی پەهلەوی بە لەنێوبردنی کۆماری کوردستان و لە سێدارەدرانی پێشەوا قازی محەممەد و هاوڕێیانی پێی وابوو دەتوانێ کۆتایی بە خەونی ئازادیی کوردستان بێنێ. بەڵکوو ۷٥ساڵ پاش لە لە سێدارەدانیان، گەلی کورد لە تێکۆشان و خەبات بۆ ئازادی و سەربەخۆیی کۆڵی نەداوە و تا کۆتایی ڕێبواری ڕێگەیان دەبن.
ناوبراو باسی لەوە کرد کاربەدەستانی دەوڵەتی تاران پێیان وابوو بەو کارە دەتوانن بیری ئازدیخوازی لەنێو خەڵکی کوردستاندا بۆ هەمیشە لەنێو بەرن. بەڵام هەر وەک پێشەوا لە کاتی لە سێدارەدانیدا ڕوو بە داگیرکەران ڕایگەیاند، بە کوشتنی من بیری کوردایەتی و ئازادیخوازی لە کوردستاندا نەک هەر لە بەین ناچێ، بەڵکوو لە داهاتوودا بەهێزتریش دەبێ ڕووداوەکانی دواتر ڕەوایی ئەو وتە حەکیمانەی پێشەوایان سەلماند کە گەلی کورد نەک هەر دەستی لە خەبات و بەرخۆدان و ئامانجەکانی کۆماری کوردستان هەڵنەگرت، بەڵکوو ئامانجەکانی کۆماری کوردستان بوون بە ئیلهام بەخشی خەبات بۆ ئازادیی و ڕزگاریی نەتەوەی کورد لە سەرتاسەی ناوچەکەدا.
ناوبراو باسی لەوە کرد تەنانەت ئەو هەموو سەرکوت و زەبر و زەنگەش کە ڕێژیمی کۆماری ئیسلامیی ئێران وەک میراتگری بە حەقی ڕێژیمی پاشایەتی لە ماوەی دەسەڵاتی ڕەشی خۆیدا بە دژی گەلی کورد بەکاری هێناوە، بە خەباتی یەکگرتووانەی سیاسی و مەدەنی خەڵکی کوردستان وڵامی تووندی پی دراوەتەوە. ئەوەتا ئەمڕۆ لە هەر چوار پارچەی کوردستان خەبات بۆ ڕزگاریی بە شێوازی جۆراوجۆر درێژەی هەیە.
''دارا ناتق'' باسی لەوەش کرد کە ئێستا پاش تێپەڕبونی زیاتر لە حەوت دەیە بەسەر لە سێدارەدانی پێشەوا و هەڤاڵەکانیدا، دەبینین بزووتنەوەی کورد بۆتە فاکتەرێکی بە هێزی خەبات و تێكۆشان بۆ ئازادی و دێموکراسی لە ئێران و ناوچەکەدا. بیری نەتەوایەتی و ئازادیخوازانە لە سەرتاسەری کوردستاندا بە باشترین و بەرزترین شێوە خۆی نیشان دەدا.
بەشێکی دیکەی ڕێوڕەسمەکە تەرخان کرابوو بۆ پێشکەشکردنی لەوحی ڕێزلێنان و دەستەگوڵی خۆشەویستی و وەفا بۆ بنەماڵەی سەربەرزی شەهیدان.
لە کۆتایی ڕێوڕەسمەکە ئامادەبووان جارێکی دیکە پەیمانیان لەگەڵ شەهیدان و بنەماڵە سەربەرزەکانیان نوێ کردەوە هەروەک شەهیدی ڕێبەر فەرموویەتی: "باشترین پاداش بۆ شەهیدان درێژەدانی ڕێگایانە" درێژەدەری ڕێگای سەربەرزی شەهیدان بین.
